ათი ოპოზიციური პარტიის საერთო სახალხო მოძრაობის ეროვნული საბჭო საქართველოს პრეზიდენტს მიხეილ სააკაშვილსა და პარლამენტის თავმჯდომარეს ნინო ბურჯანაძეს საქართველოში შექმნილი პოლიტიკური კრიზისის დაძლევის მიზნით ოთხი მოთხოვნით მიმართავს.

”1.პარლამენტის მორიგი არჩევნები ჩატარდეს კონსტიტუციურ ვადაში - 2008 წლის გაზაფხულზე; 2. არჩევნები ჩაატაროს პოლიტიკური პარიტეტის საფუძველზე შექმნილმა საარჩევნო ადმინისტრაციამ; 3. მრავალმანდატიან მაჟორიტარულ საარჩევნო ოლქებში მანდატები განაწილდეს თითოეული კანდიდატისთვის მიცემული ხმების საფუძველზე; 4. გათავისუფლდნენ სინდისისა და პოლიტიკური პატიმრები,”- აცხადებს ოპოზიცია ხელისუფლების უმაღლესი პირებისადმი გაგზავნილ წერილებში.

ამასთან, ეროვნული საბჭო მიუთითებს, რომ აღნიშნული საკითხები, რომელთაც ასევე მოიცავს გაერთიანებული ოპოზიციის მიერ დღეს გამოქვეყნებული უფრო ფართო მანიფესტი, ”დაუყოვნებლივ გადასაწყვეტია”.