თურქულ-აფხაზური კომპანია ”თამსაში”, რომელიც ტყვარჩელის რაიონში ქვანახშირის მოპოვებითაა დაკავებული, გაკოტრების პირასაა, რადგანაც მის ექსპორტს ვერ ახორციელებს, იტყობინება ”აფსნიპრესი” 25 ოქტომბერს აფხაზი დეპუტატის დაურ არშბას სიტყვებზე დაყრდნობით.

კამბოჯის დროშის ქვეშ მცურავი გემი, რომელსაც ტყვარჩელიდან ქვანახშირი მოჰქონდა, საქართველოს სანაპირო დაცვამ 21 ოქტომბერს დააკავა. კიდევ ერთი გემი ანალოგიური ტვირთით ქართულმა მხარემ ივლისში დააკავა.

”თამსაშმა შესაძლოა მუშაობა შეწყვიტოს,” - განაცხდა არშბამ, ”70 ტონამდე ქვანახშირი მზად არის საექსპორტოდ, თუმცა ეს შეუძლებელია ქართული მხარის მიერ გემების დაკავების გამო”.

საქართველოს სასაზღვრო პოლიციის ცნობით, ბოლო ორი წლის მანძილზე საქართველოს ტერიტორიული წყლების აფხაზეთის მონაკვეთზე 25-ზე მეტი გემი იქნა დაკავებული. თბილისის განცხადებით, თვითგამოცხადებული აფხაზეთის ტერიტორიული წყლები და პორტები საქართველოს იურისდიქციით დახურულია.

აფხაზი დეპუტატის დაურ არშბას თქმით, აფხაზეთის ეროვნულმა უშიშროების საბჭომ დაუყონებლივ უნდა განიხილოს ეს საკითხი. მისი თქმით, ტყვარჩელის ადგილობრივი ბიუჯეტის 70% ქვანახშირის მოპოვებიდან შემოსული თანხებით ივსება.