ოპოზიციური კოალიციის წევრმა გიორგი ხაინდრავამ 13 მარტს განაცხადა, რომ ლონდონში ბადრი პატარკაციშვილის მეღლესთან, ინა გუდავაძესთან გამართულ შეხვედრაზე მათ ტელეკომპანია ”იმედის” ბედზე ისაუბრეს.

მან თბილისში ჟურნალისტებს განუცხადა, რომ შეხვედრას ასევე ესწრებოდა პატარკაციშვილის ბიზნეს პარტნიორი და მეგობარი ბორის ბერეზოვსკი.

ხაინდრავამ თავი შეიკავა შეხვედრის დეტალებზე საუბრისგან, თუმცა განაცხადა, რომ უახლოეს მომავალში პატარკაციშვილის მეუღლე თავად აპირებს განცხადების გაკეთებას ამ საკითხზე.  მან ასევე აღნიშნა, რომ მიუხედავად საქართველოს ხელისუფლების მცდელობისა ”ხელში ჩაეგდო” ტელეკომპანია, ”ჩვენ ამის უფლებას არ მივცემთ”.

პატარკაციშვილის ოჯახმა თებერვალში გამოქვეყნებულ განცხადებაში აღნიშნა: ”უპირველეს ყოვლისა, ოჯახი გააგრძელებს ბადრი პატარკაციშვილის საქველმოქმედო ფონდის საქმიანობას და დამოუკიდებლად გადაწყვეტს ტელერადიოკომპანია “იმედის” ბედს. სწორედ ეს ორი პროექტი  იყო უმნიშვნელოვანესი ბადრის ცხოვრებაში”.

ტელეკომპანია ”იმედმა” მაუწყებლობა გასული წლის დეკემბერში შეწყვიტა, რადიო ”იმედი” კი კვლავ განაგრძობს მუშაობას.