თვითგამოცხადებული აფხაზეთის პარლამენტმა 20 მარტს მიღებულ განცხადებაში გააფრთხილა, რომ თბილისის უკანასკნელი ნაბიჯები მიუთითებს, რომ ”აღებულია კურსი კიდევ ერთი სამხედრო ინტერვენციის მზადებისაკენ აფხაზეთის რესპუბლიკაში,” იუწყება ”აფსნიპრესი”.

განცხადებაში ნათქვამია, რომ თბილისის ბოლო დროინდელ პროვოკაციულ ქმედებებს შორის უკანასკნელი იყო საქართველოს უპილოტო მზვერავი თვითმფრინავის მიერ აფხაზეთის ”საჰაერო სივრცის” დარღვევა. აფხაზეთის დე ფაქტო ხელისუფლებამ განაცხადა, რომ მათ ისრაელის კომპანია Elbit Systems-ის წარმოების საშუალო ზომის უპილოტო საფრენი აპარატი 18 მარტს ჩამოაგდეს. თუმცა საქართველოს თავდაცვის სამინისტრომ უარყო ეს ფაქტი.

”დაზვერვის მიზნებით ქართული მფრინავი აპარატების სისტემატიური ფრენა აფხაზეთის საჰაერო სივრცეში და ამასთანავე აფხაზურ-ქართული საზღვრის მთელ პერიმეტრზე სამხედრო ძალის, მათ შორის მძიმე ტექნიკის კონცენტრირება; აფხაზეთის ტერიტორიაზე ქართველი ჟურნალისტების პროვოკაციული მიზნებით შემოგზავნა და ამის შემდეგ მათი დაკავების გამო თბილისის მხრიდან ატეხილი პროპაგანდისტული ისტერია ; აფხაზეთის მოქალაქეების წინააღმდეგ ტერორისტული აქტები; აფხაზეთის შეიარაღებული ძალების სასწავლო ცენტრებზე თავდასხმა და ორი ინსტრუქტორის მოკვლა ადასტურებს, რომ საქართველოს ხელმძღვანელობამ აიღო კურსი კიდევ ერთი სამხედრო ინტერვენციის მზადებისაკენ აფხაზეთის რესპუბლიკაში,”- ნათქვამია განცხადებაში.

”ასეთი ქმედებების დაუშვებლობის შესახებ აფხაზეთის ხელმძღვანელობამ არაერთხელ გააფრთხილა საქართველოს ხელისუფლება,”- აცხადებენ აფხაზი დეპუტატები, ”თუმცა საქართველო აგრძელებს აფხაზურ-ქართულ საზღვარზე ვითარების დაძაბვის პოლიტიკას”.

აფხაზეთის დე ფაქტო პარლამენტმა მოუწოდა რუსეთის ხელისუფლებას, გაეროს გენერალურ მდივანს და მის მეგობართა ჯგუფს მიიღონ შესაბამისი ზომები კავკასიაში ახალი ომის თავიდან ასაცილებლად და ზემოქმედება მოახდინონ საქართველოს ხელისუფლებაზე არ გამოიყენოს ძალა აფხაზეთის წინააღმდეგ.