რუსეთის სახელმწიფო სათათბირომ 21 მარტს მიიღო რეზოლუცია, რომელშიც მოუწოდებს კრემლს განიხილოს აფხაზეთის და სამხრეთ ოსეთის დამოუკიდებლობის აღიარების მიზანშეწონილობის საკითხი, იტყობინებიან რუსული სააგენტოები.

რეზოლუცია, რომელსაც სარეკომენდაციო ხასიათი აქვს, ასევე მოუწოდებს რუსეთის პრეზიდენტს გააძლიეროს აფხაზეთსა და სამხრეთ ოსეთში მაცხოვრებელი რუსეთის მოქალაქეების უსაფრთხოების დაცვისკენ მიმართული მცდელობები.

დოკუმენტი ასევე მოუწოდებს განხილულ იქნას ”ქართულ-აფხაზური და ქართულ-ოსური კონფლიქტების ზონებში განთავსებული [რუსული] სამშვიდობო ძალების გაძლიერების შესაძლებლობის” საკითხი.

რეზოლუციაში ასევე ნათქვამია: ”კოსოვოს აღიარების პროცესი ეწინააღმდეგება საერთაშორისო ნორმებს... [აფხაზეთს და სამხრეთ ოსეთს], რომელთაც თავიანთი დე ფაქტო დამოუკიდებლობის წლების მანძილზე ააშენეს დემოკრატიული სახელმწიფოები მართვის ყველა საჭირო ატრიბუტით, კოსოვოზე ბევრად უფრო მეტი საფუძველი აქვთ, რომ ისწრაფვოდნენ საერთაშორისო აღიარებისკენ”.

მიღებული რეზოლუცია შეიცვალა მის საწყის ვარიანტთან შედარებით, რომელშიც ნათქვამი იყო, რომ რუსეთმა უნდა განიხილოს სამხრეთ ოსეთის და აფხაზეთის აღიარების საკითხი იმ შემთხვევაში, თუ საქართველო ნატოში გაწევრიანდება, ან თუ თბილისი განაახლებს საომარ მოქმედებებს ამ ორი რეგიონის წინააღმდეგ.