ნაციონალურმა მოძრაობამ, რომელმაც ფაქტიურად უკვე დაიწყო თავისი საარჩევნო კამპანია, დაასახელა მაჟორიტარობის რამდენიმე კანდიდატი ძირითადად თბილისის ერთმანდატიან  ოლქებში.

ამ მიზნით, სულ ცოტა, ოთხი ბიზნესმენი შეირჩა, მათ შორის რუსუდან კერვალიშვილი, კომპანია ”ცენტრპოინტის” თანადამფუძნებელი და თანამფლობელი - იგი სამგორის რაიონში იყრის კენჭს; გიორგი გოგუაძე, სახალხო ბანკის გენერალური დირექტორი - ისნის რაიონი; არჩილ გეგენავა, ღვინის მწარმოებელი კომპანია ”თელიანი ველის” აღმასრულებელი დირექტორი - მთაწმინდის რაიონი; და ლადო კვარაცხელია, ”იოლი ჯგუფის” დამფუძნებელი - დიდუბის რაიონი.

დეპუტატი მერაბ სამადაშვილი, ასევე ნაციონალური მოძრაობის კანდიდატურა, ნაძალადევის რაიონში იყრის კენჭს. წარსულში იგი უკვე ორჯერ იყო მაჟორიტარი დეპუტატი ამავე ოლქიდან. დილარ ხაბულიანი, მმართველი პარტიის კრწანისის ოფისის ხელმძღვანელი და გამგებელი, ამავე ოლქში იყრის კენჭს.

ტელეკომპანია ”რუსთავი 2”-მა 29 მარტს განაცხადა, რომ სოფლის მეურნეობის მინისტრი პეტრე ცისკარიშვილი ახმეტის რაიონში იყრის კენჭს მაჟორიტარ დეპუტატად. თუმცა, ცისკარიშვილის თქმით, ეს ჯერ საბოლოოდ არ არის გადაწყვეტილი.

ტელეკომპანიის ცნობით, დეპუტატმა გიორგი გეგელაშვილმა შესაძლოა ქუთაისში იყაროს კენჭი, ხოლო რუსთავის მერმა დავით ნადაშვილმა თავისივე ქალაქში. იმერეთის რეგიონის გუბერნატორი აკაკი ბობოხიძე, სავარაუდოდ, ხონში იყრის კენჭს.

პარლამენტის თავმჯდომარე ნინო ბურჯანაძე, რომელიც ამჟამად ქუთაისის მაჟორიტარი დეპუტატია, ნაციონალური მოძრაობის პარტიულ სიას ჩაუდგება სათავეში.

150-წევრიანი პარლამენტის ნახევარი პატრიული სიით, ხოლო მეორე ნახევარი 75 ერთმანდატიან ოლქში არჩეული მაჟორიტარი დეპუტატებით დაკომპლექტდება.