რუსეთის საგარეო საქმეთა სამინისტრომ 2 აპრილს კიდევ ერთხელ განაცხადა, რომ მოსკოვი არ დაპირებია პრეზიდენტ სააკაშვილს, რომ ის არასოდეს აღიარებდა აფხაზეთსა და სამხრეთ ოსეთს.

ეს განცხადება რუსეთის საგარეო უწყებამ მას შემდეგ გააკეთა, რაც პრეზიდენტმა სააკაშვილმა 31 მარტს რუსულ გაზეთ ”კომერსანტთან” ინტერვიუში განაცხადა, რომ მოსკოვში თებერვალში რუსეთის პრეზიდენტთან ვლადიმერ პუტინთან გამართულ შეხვედრაზე რუსული მხარე დაპირდა მას, რომ არ აღიარებდა თვითგამოცხადებულ რეგონებს. რუსეთის საგარეო უწყების ცნობით, სააკაშვილის განცხადებაში რამდენიმე ”უზუსტობაა”.

რუსეთის საგარეო საქმეთა სამინისტრომ ერთხელ უკვე უარყო სააკაშვილის მიერ თებერვლის ბოლოს გაკეთებული ანალოგიური განცხადება. 

2 აპრილს რუსეთის სახელმწიფო სათათბიროში გამოსვლისას რუსეთის საგარეო საქმეთა მინისტრმა სერგეი ლავროვმა ასევე წამოწია ეს საკითხი და განაცხადა, რომ პრეზიდენტი სააკაშვილი ფაქტების ”არასწორ ინტერპრეტაციას” ახდენს. კერძოდ, ლავროვმა მოიყვანა სააკაშვილის განცხადება, რომლის მიხედვითაც რუსეთი და საქართველო ”ფაქტიურად ყველაფერზე შეთანხმდნენ” რუსეთის ვმო-ში გაწევრიანებასთან  დაკავშირებით და რომ მოსკოვი მზადაა ერთობლივი საბაჟო-გამშვები პუნქტი გახსნას თვითგამოცხადებულ სამხრეთ ოსეთთან საზღვარზე.

თუმცა, რუსეთის საგარეო უწყებამ თავის განცხადებაში ასევე აღნიშნა, რომ ამ საკითხზე მოლაპარაკებების დროს რუსულმა მხარემ ხაზი გაუსვა, რომ საბაჟო კონტროლი აფხაზეთთან და სამხრეთ ოსეთთან საზღვრებზე ”მთლიანად იქნება დამოკიდებული ქართულ-აფხაზური და ქართულ-ოსური კონფლიქტების მოგვარების პროცესზე და სოხუმის და ცხინვალის თანხმობაზე”.