თბილისი წყვეტს ორმხრივ მოლაპარაკებებს რუსეთის ვაჭრობის მსოფლიო ორგანიზაციაში (ვმო) გაწევრიანების თაობაზე, სანამ კრემლი არ გააუქმებს გადაწყვეტილებას თვითგამოცხადებულ აფხაზეთთან და სამხრეთ ოსეთთან პირდაპირი ეკონომიკური ურთიერთობების დამყარების თაობაზე.

”სანამ რუსეთი არ გააუქმებს ინსტრუქციებს სოხუმთან და ცხინვალთან ურთიერთობების ლეგალიზების თაობაზე, მანამ საქართველო არ დაუბრუნდება ორმხრივი მოლაპარაკებების მაგიდას, ”- განუცხადა ჟენევიდან თამარ კოვზირიძემ, ეკონომიკური განვითარების მინისტრის მოადგილემ ტელეფონით ”საზოგადოებრივ მაუწყებელს”.

”ეს არის ჩვენი ახალი პოზიცია ახალი რეალობებიდან გამომდინარე,”- აღნიშნა მან.

აფხაზეთისთვის ეკონომიკური სანქციების ცალმხრივად მოხსნისა და სოხუმთან და ცხინვალთან ურთიერთობების, მათ შორის ეკონომიკური კავშირების ლეგალიზების თაობაზე მოსკოვის გადაწყვეტილებამდე, თბილისი აცხადებდა, რომ რუსეთის ვმო-ში გაწევრიანებას მხოლოდ აფხაზეთსა და სამხრეთ ოსეთში მდებარე სასაზღვრო-გამშვები პუნქტების ლეგალიზების შემთხვევაში დათანხმდებოდა.

პრეზიდენტმა სააკაშვილმა თებერვალში განაცხადა, რომ  არსებობდა წინასწარი შეთანხმება რუსეთთან განთიადი-ადლერის და როკი-ქვემო ზარამაგის გამშვები პუნქტების ერთობლივი  - ქართულ-რუსული კონტროლის შესახებ. თუმცა რუსეთმა უარყო რაიმე შეთანხმება და აღნიშნა, რომ ამ საკითხის გადაწყვეტა სოხუმის და ცხინვალის პოზიციაზე იქნებოდა დამოკიდებული.