ბადრი პატარკაციშვილის ოჯახმა 29 მაისს გავრცელებულ განცხადებაში აღნიშნა, რომ თბილისის საქალაქო სასამართლომ ”ფარულად” და ”სამართლებრივი საფუძვლის გარეშე” გარდაცვლილი ბიზნესმენის ნათესავის, ჯოზეფ ქეის სასარგებლოდ მიიღო გადაწყვეტილება. ქეის განცხადებით, მას პატარკაციშვილის სურვილის შესაბამისად, ბიზნესმენის ქონების მართვის უფლება მიენიჭა.

თბილისის საქალაქო სასამართლოს 14 მაისით დათარიღებული გადაწყვეტილება უკრძალავს პატარკაციშვილის ქვრივს, ინა გუდავაძეს, მის შვილს ლიანა ჟმოტოვას და პატარკაციშვილის დას ია პატარკაციშვილს რაიმე ქმედებების განხორციელებას გარდაცვლილი ბიზნესმენის სამემკვიდრეო ქონებასთან დაკავშირებით. 

სასამართლოს გადაწყვეტილება აძლევს უფლებას ჯოზეფ ქეის განახორციელოს ის ქმედებები, რომელსაც იგი ჩათვლის საჭიროდ საქართველოში პატარკაციშვილის ქონების მართვის მიზნით.

პატარკაციშვილის ოჯახმა ჯოზეფ ქეის წინააღმდეგ საქმე ნიუ-იორკის სასამართლოში 4 აპრილს აღძრა და მას მაქინაციებში დასდო ბრალი.   

პატარკაციშვილის ოჯახმა 29 მაისს გამოქვეყნებულ წერილობით განცხადებაში აღნიშნა, რომ ქეიმ როგორღაც მოახერხა ”საეჭვო გარემოებებში” მხოლოდ ქართული სასამართლოს დარწმუნება მიეცა მისთვის პატარკაციშვილის ქონების მართვის უფლება.