ქართულმა მხარემ მიიღო გადაწყვეტილება ”ცალმხრივად შეწყვიტოს ცეცხლი”, რაც იმის ნიშანია, რომ თბილისს დაძაბულობის განმუხტვა სურს, განაცხადა სახელმწიფო მინისტრმა რეინტეგრაციის საკითხებში თემურ იაკობაშვილმა თბილისში 18:40 საათზე გამართულ პრესკონფერენციაზე.

”ჩვენმა მხარემ მიიღო გადაწყვეტილება არ უპასუხოს ცეცხლით დროის გარკვეული პერიოდი. ეს არის ჩვენი მხრიდან კიდევ ერთი მცდელობა დავარწმუნოთ სეპარატისტები სამხედრო კონფრონტაციის უაზრობაში,” - განაცხადა იაკობაშვილმა. ”სამხედრო კონფრონტაციას შეიძლება მოყვეს ძალიან დიდი მსხვერპლი. ამიტომ, ჩვენ ყველაფერს ვაკეთებთ იმისათვის, რომ თავიდან ავიცილოთ კონფრონტაცია”. 

”ჩვენი მხარე კიდევ ერთხელ აცხადებს, რომ ცალმხრივად წყვეტს ცეცხლს იმიტომ კი არა, რომ ჩვენ ვინმესი გვეშინია, არამედ იმიტომ, რომ ჩვენ გვინდა მშვიდობა და იმედი გვაქვს, რომ ამ გზავნილს ისინი ადექვატურად აღიქვამენ და შეწყვეტენ ჩვენი პოზიციების და ჩვენი მშვიდობიანი მოსახლეობის დაბომბვას,” - განაცხადა მან.

იაკობაშვილმა ასევე აღნიშნა, რომ ეს გადაწყვეტილება ქართულმა მხარემ დღეს საღამოს ცხინვალში შერეული სამშვიდობო ძალების სარდალთან მარატ კულახმეტოვთან შეხვედრის შემდეგ გააკეთა.

მისი თქმით, იგი ვერ დაუკავშირდა სამხრეთ ოსური მხარის თანათავმჯდომარეს ბორის ჩოჩიევს. ”ის არ პასუხობს ტელეფონს,” - განაცხადა იაკობაშვილმა. ”და [ედუარდ] კოკოითი [სამხრეთ ოსეთის ლიდერი] საერთოდ არ არის ცხინვალში”.