საქართველომ ჰააგის საერთაშორისო სასამართლოში რუსეთის წინააღმდეგ სარჩელი შეიტანა, რომელშიც ნათქვამია, რომ რუსეთმა აფხაზეთის და სამხრეთ ოსეთის სეპარატისტული ხელისუფლების საშუალებით დაარღვია კონვენცია, რომელიც რასიზმის აღმოფხვრას ეხება, განაცხადა სასამართლომ 12 აგვისტოს.    

სასამართლოს პრეს-რელიზში ნათქვამია, რომ საქართველოს მტკიცებით რუსეთმა დაარღვია 1965 წლის საერთაშორისო კონვენცია რასობრივი დისკრიმინიციის ყველა ფორმის აღმოფხვრის თაობაზე (CERD) ”სამხრეთ ოსეთსა და აფხაზეთში მისი ინტერვენციის სამი მკაფიო ფაზის დროს” 1990 წლიდან 2008 წლის აგვისტოს პერიოდში.

”რუსეთის ფედერაცია, სახელისუფლებო უფლებამოსილების მქონე სახელმწიფო ორგანოების, სახელმწიფო წარმომადგენლების და სხვა პირების და სტრუქტურების ჩათვლით, ასევე სამხრეთ ოსეთის და აფხაზეთის სეპარატისტული ძალების და რუსეთის ფედერაციის მითითებებით და მისი კონტროლის ქვეშ მოქმედი პირების ჩათვლით, პასუხისმგებელია CERD-ის ფუნდამენტალური ვალდებულებების, მათ შორის 2, 3, 4, 5 და 6 მუხლების სერიოზულ დარღვევაზე,” - აცხადებს საქართველო სარჩელში.

ამავდროულად, რუსეთი კიდევ უფრო აძლიერებს მცდელობებს საერთაშორისო დონეზე გაიტანოს თავისი ბრალდებები საქართველოს წინააღმდეგ, რომ ამ უკანასკნელის მიერ ბოლო დროს სამხრეთ ოსეთში განხორციელებული ქმედებები ოსი ხალხის ”გენოციდის” ტოლფასია. რუსეთის თქმით, 2 000 ოსი დაიღუპა მას შემდეგ, რაც, მისი თქმით, საქართველომ სამხედრო იერიში მიიტანა თვითგამოცხადებულ რეგიონზე.

რუსეთის გენერალურმა პროკურატურამ არ გამორიცხა, რომ შესაძლოა სასამართლოში საქმე აღძრას პრეზიდენტ სააკაშვილის წინააღმდეგ.

”შეგროვილი მტკიცებულება შესაძლოა გამოყენებულ იქნას როგორც საერთაშორისო სასამართლოში სარჩელის შესატანად, ასევე რუსეთის სასამართლო ორგანოების მიერ სამხრეთ ოსეთში მცხოვრები რუსი მოქალაქეების წინააღმდეგ ჩადენილი დანაშაულების განსახილველად,” - იტყობინება ”ინტერფაქსი” რუსეთის გენერალური პროკურატურის წარმომადგენლის მარინა გრიდნევას სიტყვებზე დაყრდნობით.

რუსეთის საგარეო საქმეთა მინისტრმა სერგეი ლავროვმა 13 აგვისტოს კიდევ ერთხელ დაადანაშაულა საქართველო გენოციდში: ”ასობით ჩვენი მოქალაქე [სამხრეთ ოსეთიდან] ამზადებს სარჩელს საერთაშორისო სასამართლოებში შესატანად”.