პრეზიდენტმა სააკაშვილმა განაცხადა ნატოს ჩრდილოატლანტიკური საბჭოს სხდომაზე, რომ საქართველო არ ყოფილა ომის ინიციატორი და რომ თბილისს გააჩნია ამის დამადასტურებელი მტკიცებულება.

ჩრდილოატლანტიკური საბჭოს მიერ თბილისში დღეს პირველად გამართულ სხდომაზე მიხეილ სააკაშვილმა განაცხადა, რომ ეს აგრესია საქართველოს წინააღმდეგ ”წლების და თვეების წინ” დაიგეგმა.

”საქართველოში რუსული ძალები 7 აგვისტოს დილის საათებში შემოიჭრნენ და ეს არის ფაქტი, რომელსაც რუსეთის ფედერაციაც კი აღარ უარყოფს,” - განაცხადა სააკაშვილმა.

მისი თქმით, ეს იყო ”არაპროვოცირებული შეტევა” საქართველოზე.

სააკაშვილმა ასევე აღნიშნა, რომ რუსეთის მიზანი იყო საქართველოს დემოკრატიულად არჩეული ხელისუფლების ჩამოგდება და დასავლეთში ქვეყნის ინტეგრაციის შეფერხება. მან ასევე დასძინა, რომ ახლა რუსეთი ცდილობს ეთნიკური წმენდის შედეგების ლეგალიზებას. სააკაშვილმა ასევე აღნიშნა, რომ მიუხედავად გადაჭარბებული ძალისა, საქართველომ მოახერხა აგრესიას შეწინააღმდეგებოდა.

სააკაშვილის თქმით, მას სურს, რომ სხდომამ განიხილოს ცეცხლის შეწყვეტის შესახებ ექვსპუნქტიანი შეთანხმების სრული განხორციელების უზრუნველყოფის საკითხი.

მან ხაზი გაუსვა, რომ ჩრდილოეთ ატლანტიკური საბჭოს ვიზიტი საქართველოში მნიშვნელოვანი სიგნალია მსოფლიოსთვის. მისი თქმით, უკვე მტკიცე და ძლიერი ურთიერთობები საქართველოსა და ნატოს შორის კიდევ უფრო გაძლიერდება.

სააკაშვილი მიესალმა ნატო-საქართველოს კომისიის შექმნას და განაცხადა, რომ ეს მექნიზმი ”გააფართოებს და დააჩქარებს ჩვენს თანამშრომლობას”.

თავის გამოსვლაში ნატოს გენერალურმა მდივანმა იააპ დე ჰოოპ სხეფერმა კიდევ ერთხელ გაიმეორა ნატოს პოზიცია და განაცხადა, რომ რუსეთმა ”არაპროპორციული ძალა” გამოიყენა საქართველოს წინააღმდეგ.

მან ასევე განაცხადა, რომ რუსეთმა სრულად უნდა შეასრულოს ექვსპუნქტიანი გეგმა, რომელსაც ნატომ დაუჭირა მხარი.