ევროპის საბჭოს საპარლამენტო ასამბლეამ (PACE) მიიღო რეზოლუცია რუსეთის დელეგაციის უფლებამოსილების დადასტურების თაობაზე, თუმცა დასძინა, რომ ეს უფლებამოსილება შესაძლოა ნებისმიერ დროს იქნას ჩამორთმეული, იტყობინება ევროპის საბჭო 1 ოქტომბერს.  

საპარლამენტო ასამბლეის 24-კაციანმა ჯგუფმა მოითხოვა რუსეთის დელეგაციის უფლებამოსილების საკითხის ხელახლა განხილვა ევროპის საბჭოს ”ძირითადი პრინციპების სერიოზული დარღვევის საფუძველზე”, რაც საქართველოსთან წარმოებულ ომს უკავშირდება.

PACE-ს პარლამენტარებს მიაჩნიათ, რომ რუსეთ-საქართველოს ომი უკვე თავისთავად წარმოადგენს ”ევროპის საბჭოს წესდების, ასევე მათი, როგორც წევრი სახელმწიფოების მოვალეობების და ვალდებულებების სერიოზულ დარღვევას”. თუმცა, პარლამენტარები შეთანხმდნენ, რომ მნიშვნელოვანია, რომ უზრუნველყოფილ იქნას დიალოგი და ნდობის აღდგენა მხარეებს შორის.

”იმისათვის, რომ ეს დიალოგი კონსტრუქციული და აზრიანი იყოს, მნიშვნელოვანია, რომ რუსეთმა შეასრულოს ცეცხლის შეწყვეტის შესახებ შეთანხმება და გამოიყვანოს ძალები ომამდე არსებულ პოზიციებზე და დაუშვას ევროკავშირისა და ეუთოს დამკვირვებლების განთავსება,”- ნათქვამია რეზოლუციაში.