რუსეთის საგარეო საქმეთა სამინისტრომ 15 ოქტომბერს განაცხადა, რომ ჰააგის საერთაშორისო სასამართლომ ვერ მოძებნა საფუძველი დროებითი ზომების მხოლოდ რუსეთისთვის დაკისრების თაობაზე.

”სასამართლომ ეს ზომები ორივე მხარის მიმართ მიიღო,”- აცხადებს რუსეთის საგარეო უწყება, ”ისინი ზოგად ხასიათს ატარებენ და მიუთითებენ მხარეებს აღნიშნული კონვენციით გათვალისწინებული ვალდებულებების შესრულების აუცილებლობაზე”.

საქართველომ ჰააგის სასამართლოში 12 აგვისტოს რუსეთის წინააღმდეგ შეტანილ სარჩელში განაცხადა, რომ რუსეთმა დაარღვია 1965 წლის საერთაშორისო კონვენცია რასობრივი დისკრიმინაციის ყველა ფორმის აღმოფხვრის თაობაზე ”სამხრეთ ოსეთსა და აფხაზეთში მისი ინტერვენციის სამი მკაფიო ფაზის დროს” 1990 წლიდან 2008 წლის აგვისტოს პერიოდში. ამ ძირითადი სარჩელის გარდა საქართველოს მეორე თხოვნა იყო რუსეთზე დროებითი ზომების დაკისრება ”ეთნიკური წმენდის” შეჩერების მიზნით.

საერთაშორისო სასამართლომ 15 ოქტომბერს ამ უკანასკნელი თხოვნის საპასუხოდ მიიღო გადაწყვეტილება, რომლითაც სავალდებულო წესით დააკისრა რუსეთსა და საქართველოს დაიცვან მოქალაქეები აფხაზეთსა და სამხრეთ ოსეთში, ასევე მიმდებარე ტერიტორიებზე. თბილისში უკვე შეაფასეს ეს გადაწყვეტილება, როგორც ”ძალიან დიდი გამარჯვება”.

მიუხედავად იმისა, რომ რუსეთი აცხადებს, რომ კონვენციის პრინციპების ერთგულია და ამასვე ელის ქართული მხარისაგან, მაინც რჩება თავის პირვენდელ პოზიციაზე იმასთან დაკავშირებით, რომ ჰააგის საერთაშორისო სასამართლოს იურისდიქციაში არ შედის 15 ოქტომბერს მიღებული გადაწყვეტილება.

”იმის გათვალისწინებით, რომ სასამართლოს გადაწყვეტილება დროებითი ზომების შესახებ წინასწარ ხასიათს ატარებს, ჩვენ განხილვის შემდეგ სტადიაზე ვაპირებთ გავაგრძელოთ იმის დამტკიცება, რომ სასამართლოს არ აქვს იურისდიქცია აღნიშნულ საკითხზე,”- აცხადებს რუსეთის საგარეო საქმეთა სამინისტრო.

საერთაშორისო სასამართლო შემდგომ ეტაპზე განიხილავს მიიღოს წარმოებაში თუ არა საქმე ”საქართველო რუსეთის წინააღმდეგ”, რასაც, სავარაუდოდ, ხანგრძლივი დრო დასჭირდება.