პარლამენტის ყოფილმა თავმჯდომარემ ნინო ბურჯანაძემ 31 ოქტომბერს განაცხადა, რომ ის ბოდიშს იხდის იმის გამო, რომ ვერ შეძლო იმ ადამიანების დაცვა, ვინც გასული წლის 7 ნოემბრის საპროტესტო აქციის დარბევისას "მორალური და ფიზიკური ტრავმა მიიღო."

ბურჯანაძემ,  რომელმაც კვირის დასაწყისში ”მკვეთრად ოპოზიციური” პარტიის  - დემოკრატიული მოძრაობა - ერთიანი საქართველო - შექმნის შესახებ გამოაცხადა, გუშინ საღამოს ჯერ ტელეკომპანია ”კავკასიისა” და შემდეგ ”საზოგადოებრივი მაუწყებლის” პირდაპირ ეთერში ისაუბრა. მისი გამოსვლა ”კავკასიის” ეთერში საკმაოდ დიდი მოულოდნელობა იქნებოდა თვეების წინ, როცა ის პარლამენტს თავმჯდომარეობდა.

ინტერვიუში ბურჯანაძემ გააგრძელა ის ხაზი, რომელიც მან პრეზიდენტისადმი გაგზავნილ ღია წერილში გაატარა, მათ შორის იმ თვალსაზრისითაც, რომ იგი შეეცადა გამიჯვნოდა ხელისუფლების იმ არაპოპულარულ ქმედებებს, რასაც მისი პარლამენტის თავმჯდომარეობის პერიოდში ჰქონდა ადგილი.

მისი თქმით, ის ცდილობდა გადაწყვეტილების მიღების პროცესზე შიგნიდან მოეხდინა გავლენა და ოპოზიციური სეგმენტი ეკავა გუნდის შიგნით. ბურჯანაძის განცხადებით, ის არ გადადგა 7 ნოემბერს  - მიუხედავად იმისა, რომ მისი ორივე შვილი დაჟინებით თხოვდა მას ამის გაკეთებას - რადგან მაშინ გადადგომა ”უარეს შედეგებს გამოიწვევდა... შეიძლება ტანკებიც კი გამოჩენილიყვნენ ქუჩებში”. მისი თქმით, 7 ნოემბერს გადადგომა მისთვის იქნებოდა პოლიტიკური ქულების მომტანი, თუმცა არა ქვეყნისთვის სასარგებლო ნაბიჯი. ბურჯანაძემ განაცხადა, რომ მისთვის უცნობია, თუ ვინ გასცა საპროტესტო აქციის დარბევის ბრძანება. 

პარლამენტის ყოფილმა თავმჯდომარემ აღიარა, რომ საკუთარი პოლიტიკური გუნდის არ ყოლა მისი სისუსტე იყო, რაც მას გადაწყვეტილების მიღების პროცესზე გავლენის მოხდენაში ხელს უშლიდა.

”კავკასიის” ეთერში შესული ერთ-ერთი სატელეფონო ზარის ავტორმა ბურჯანაძეს ყოფილ საგარეო საქმეთა მინისტრთან სალომე ზურაბიშვილთან დაპირისპირება შეახსენა, რომელმაც 2005 წელს მთავრობიდან ოპოზიციაში გადასვლის წინ პარლამენტი მკვეთრად გააკრიტიკა. მაშინ ბურჯანაძემ განაცხადა: ”მე ნაკლებად მჯერა იმ ადამიანების, რომლებიც კრიტიკას მას შემდეგ იწყებენ, რაც მათ სავარძელი გამოეცლებათ”. მაყურებელმა ჰკითხა ბურჯანაძეს ჰგავდა თუ არა მისი მდგომარეობა იმ ვითარებას, რომელშიც ზურაბიშვილი სამი წლის წინ აღმოჩნდა, როცა ის სიბრაზით საუბრობდა ყოფილ მოკავშირეებზე თანამდებობის დაკარგვის შემდეგ. ბურჯანაძემ უპასუხა, რომ მან საკუთარი ინიციატივით თქვა უარი ქვეყანაში მეორე პირის თანამდებობაზე, როცა ბოლო საპარლამენტო არჩევნებში აღარ მიიღო მონაწილეობა.

აგვისტოს ომზე საუბრისას ბურჯანაძემ განაცხადა, რომ პრეზიდენტმა მას დაურეკა და შეხვედრა თხოვა. ეს შეხვედრა 3 აგვისტოს შედგა.

”ამ შეხვედრის შედეგად დამრჩა განცდა, რომ პრეზიდენტს არ ჰქონდა ომში ჩართვის გადაწყვეტილება მიღებული,”- განაცხადა ბურჯანაძემ, ”სწორედ ამიტომაც ვკითხულობ ახლა რა მოხდა და ვინ ურჩია პრეზიდენტს ომში ჩაბმულიყო”.

კითხვაზე თუ ვინ იქნებიან მისი ახალი პოლიტიკური გუნდის წევრები, ბურჯანაძემ უპასუხა, რომ პარტია არ იქნება ორიენტირებული ”ცნობილი სახეების” წარმოჩენაზე, თუმცა მან 23 ნოემბერს დაგეგმილ პარტიის პრეზენტაციამდე დეტალებზე საუბრისაგან თავი შეიკავა.