აგვისტოს მოვლენების დროს დაზარალებულ ადამიანთა 95% საცხოვრებელი სახლებით დაკმაყოფილდა, ხოლო მათ ვისაც უარი განაცხადეს ბინებზე კომპესაციები მიიღეს 10 ათასი დოლარის ოდენობით.

ამის შესახებ დღეს შინაგან საქმეთა, ლტოლვილთა და განსახლების მინისტრებმა ვანო მერაბიშვილმა და კობა სუბელიანმა და ასევე  სახელმწიფო მინისტრმა რეგიონალური მართვის საკითხებში დავით ტყეშელაშვილმა ერთობლივ პრესკონფერნციაზე განაცხადეს.  მინისტრები პრეზიდენტის დავალებით საქართველოს სხვადასხვა რაიონებში ახალი საცხოვრებელი სახლების მშენებლობის საკითხებს კურირებდნენ.

შს მინისტრის ვანო მერაბისვილის ინფორმაციით, ამ ეტაპისთვის აშენებულია 3 963 სახლი, მოხდა 1500 ბინის რეაბილიტაცია, ასევე  სახელმწიფო საკუთრებაში არსებული ბინების შეკეთება, შეძენილ იქნა 453 ბინა. ახლად აშენებული სახლების უმეტესობა მოწყობილია პირველადი მოხმარების ნივთებით, ასევე უზრუნვეყოფილია ბუნებრივი აირით და წყლით. 

რეგიონალური მართვის საკითხებში სახელმწიფო მინისტრის დავით ტყეშელაშვილის განცხადებით, სულ  ამ დროისთვის 5 041 ოჯახი, ანუ 16 528 ადამიანია შესახლებული ახალ საცხოვრებელ სახლებში. 

”ეს პროცესი გრძელდება და ჩვენ ვვარაუდობთ, რომ ახალ წლამდე აგვისტოში რუსეთის აგრესიის შედეგად დევნილთა 90-95% მთლიანად იქნება დაკმაყოფილებული”, - განაცხადა ტყეშელაშვილმა. 

კობა სუბელიანის თქმით, ახალ საცხოვრებელ სახლებში შესახლებულ ადამიანებზე მათთვის საჭირო პირველადი ნივთების  შესაძენად სულზე 200 ლარი გაიცემა.

აღნიშნული სახლების მშენებლობა და რეაბილიტაცია, ვანო მერაბიშვილის ინფორმაციით,  მთლიანად სახელმწიფო ბიუჯეტიდან დაფინანსდა, თუმცა ეს დეფიციტი სხვადასხვა ქვეყნებიდან დამხარების მიზნით საქართველოსთვის გამოყოფილი თანხებით შეივსება.

დღევანდელ პრესკონფერნციაზე ვანო მერბიშვილმა აღნიშნული მონაცემების საჯაროდ განხილვა მოითხოვა, სადაც, მისი თქმით, დეტალურად არის გაწერილი თანხების ხარჯვის პროცესი. 

შს სამინისტრომ მოგვიანებით თავის ვებ-გვერდზე გამოაქვეყნა რამოდენიმე დოკუმენტი სადაც გაწერილია ხარჯები და გაწეული სამუშაოს აღწერილობა.