საქართველო შეიარაღებული ძალების გაერთიანებული შტაბის უფროსმა, ვიცე-პოლკოვნიკმა ვლადიმერ ჩაჩიბაიამ თანამდებობა დანიშვნიდან ოთხი თვის თავზე დატოვა.

თუმცა, თავდაცვის სამინისტრო ოფიციალურ კომენტარში თავს არიდებს ტერმინის ”გადადგომის” გამოყენებას და ამის სანაცვლოდ აცხადებს, რომ მან მხოლოდ თანამდებობა შეიცვალა და ”დააწინაურეს” თავდაცვის მინისტრის პირველი მოადგილის თანამდებობაზე.

ჩაჩიბაიას მოადგილე, დევი ჭანკოტაძე შეიარაღებული ძალების გაერთიანებული შტაბის ახალი უფროსი გახდება. ორივე საკადრო წარდგინება 5 მარტს თავდაცვის მინისტრმა დავით სიხარულიძემ განახორციელა.

”პოლკოვნიკი ჩაჩიბაია გახდება ჩემი პირველი მოადგილე, რომელიც კურირებას გაუწევს თავდაცვის პოლიტიკის და დაგეგმვის დეპარტამენტს, ანალიტიკურ დეპარტამენტს და ასევე თემატურად მე მინდა მას ვთხოვო და მთლიანად ჩავაბარო განათლების სფერო,”- განაცხადა სიხარულიძემ ბრიფინგზე, რომელსაც ორივე კანდიდატი ესწრებოდა. 

ჩაჩიბაიას გადადგომის თაობაზე ხმები ბოლო ერთი კვირის განმავლობაში ვრცელდებოდა, თუმცა თავდაცვის სამინისტრომ ეს ინფორმაცია კატეგორიულად უარყო.

ქართული პრესის ვარაუდით ჩაჩიბაიას უკმაყოფილება გამოიწვია თავდაცვის მინისტრის ამჟამინდელი მოადგილის და სასჯელაღსრულების დეპარტამენტის ყოფილი უფროსის ბაჩო ახალაიას სავარაუდო ჩარევამ გენშტაბის საქმიანობაში. თავდაცვის მინისტრის მოადგილის რანგში ბაჩო ახალაია გაერთიანებული შტაბის ლოგისტიკურ ერთეულის გაკონტროლებას კურირებს. ახალაია, რომელიც ამ თანამდებობაზე 2008 წლის დეკემბერში დაინიშნა, შინაგან საქმეთა მინისტრთან ვანო მერაბიშვილთან დაახლოებულ პირად ითვლება.   

4 მარტს რადიო ”თავისუფლების” თბილისის ბიურო იტყობინებოდა ჩაჩიბაიას სიტყვებზე დაყრდნობით, რომ პრეზიდენტმა მისი განცხადება დააკმაყოფილა.

”პოლკოვნიკი ჩაჩიბაია არის გამოცდილი სამხედრო და პრინციპული ოფიცერი და არმიაში ორმაგი-ხელმძღვანელობა - რომლის შესახებაც პრესა იტყობინებოდა - მისთვის მიუღებელი იყო... როგორც ჩანს, სწორედ ეს არის გადადგომის შესახებ მისი გადაწყვეტილების მიზეზი,” - განაცხადა სამხედრო ექსპერტმა და რადიო ”თავისუფლების” თბილისის ბიუროს ჟურნალისტმა კობა ლიკლიკაძემ.

ომის შემდეგ გაერთიანებული შტაბის ხელმძღვანელის ეს უკვე მეორე ცვლილებაა. 4 ნოემბერს განხორციელებული საკადრო ცვლილების შედეგად გენშტაბის უფროსად ჩაჩიბაიამ ზაზა გოგავა შეცვალა. ეს უკანასკნელი სასაზღვრო პოლიციის უფროსად დაინიშნა.