ნატო პარტნიორობა მშვიდობისთვის პროგრამის ფარგლებში საქართველოში სამხედრო წვრთნების ჩატარებას გეგმავს, რაც მიზნად ისახავს ”ნატოსა და პარტნიორ სახელმწიფოებს შორის ურთიერთქმედების” გაუმჯობესებას, განაცხადა ნატომ 15 აპრილს გამოქვეყნებულ განცხადებაში.

Cooperative Longbow-2009 მიზნად ისახავს სამეთაურეო მომზადებას კრიზისზე რეაგირების ოპერაციებში მრავალეროვნული ბრიგადების დონეზე. შემდეგ ამას მოყვება საველე წვრთნები Cooperative Lancer-2009, რაც მიზნად ისახავს მშვიდობის ხელშეწყობის ოპერაციებში მომზადებას ბატალიონების დონეზე, ნათქვამია ნატოს განცხადებაში.  

წვრთნები ვაზიანის სამხედრო ბაზაზე ჩატარდება და მასში მონაწილეობას მიიღებს 1 300 სამხედრო ნატოს 19 წევრი და პარტნიორი სახელმწიფოდან: ალბანეთი, სომხეთი, აზერბაიჯანი, ბოსნია და ჰერცეგოვინა, კანადა, ხორვატია, ჩეხეთის რესპუბლიკა, საქართველო, საბერძნეთი, უნგრეთი, ყაზახეთი, მოლდოვა, სერბეთი, ესპანეთი, მაკედონია, თურქეთი, არაბეთის გაერთიანებული საამიროები, გაერთიანებული სამეფო და ამერიკის შეერთებული შტატები.  

განცხადებაში ასევე ნათქვამია, რომ ამ წვრთნების მომზადება 2008 წლის გაზაფხულზე დაიწყო.