RSS
Mobile
Twitter
Facebook
საპროტესტო აქციების ორგანიზატორმა პარტიებმა შექმნეს 4-კაციან ჯგუფი, რომელიც მზადაა დღესვე შეხვდეს პარლამენტის თავმჯდომარეს დავით ბაქრაძეს, რათა მომზადდეს შეხვედრა პრეზიდენტ სააკაშვილთან კრიზისის განმუხტვის მიზნით.
ჯგუფში შედიან გუბაზ სანიკიძე ეროვნული ფორუმიდან, რესპუბლიკელი თინა ხიდაშელი ალიანსი საქართველოდან; ამავე ალიანსიდან ირაკლი ალასანიას გუნდის წევრი ვიქტორ დოლიძე და უპარტიო ოპოზიციონერი პოლიტიკოსი კოკა გუნცაძე.
”როგორც მოსამზადებელი ჯგუფი, ისინი ახლავე მზად არიან შეხვდნენ ბაქრაძეს, რომ მომზადდეს ძალიან მოკლე ვადაში - და თუ შესაძლებელია როგორც კი ჩამოვა მიხეილ სააკაშვილი, თუ არა ხვალ - შეხვედრა მიხეილ სააკაშვილთან,”- განაცხადა საქართველოს გზის ლიდერმა სალომე ზურაბიშვილმა.
ზურაბიშვილმა განაცხადა, რომ ბაქრაძესთან შეხვედრა უნდა შედგეს პარლამენტის შენობაში, სადაც შესვლაზე არანაირი დაბრკოლება არ იქნება.
მისი თქმით, მზადდება ოპოზიციის მეორე ჯგუფი, რომელიც მიხეილ სააკაშვილს შეხვდება.
ამასთან, მან განაცხადა, რომ ოპოზიციამ გადადო 8 მაისისთვის არსებული პიკეტირების და გზების გადაკეტვის გეგმები. ”ეს არის ჩვენი პასუხისმგებლობის მაჩვენებლი ამ ქვეყნის და მისი ინტერესების წინაშე,”- განაცხადა მან.
ზურაბიშვილმა ეს განცხადება ოპოზიციონერი ლიდერების 2-საათიანი შეხვედრის შემდეგ გააკეთა, სადაც საპროტესტო აქციების ორგანიზატორი ძალები განიხილავდნენ ბაქრაძის წინადადებას შეხვედრასთან დაკავშირებით.
ამ შეხვედრას არ დასწრებიან ალიანსი თავისუფლებისთვის ლიდერები. ამ ალიანსის წარმომადგენელმა, პარტია თავისუფლების ლიდერმა კონსტანტინე გამსახურდიამ განაცხადა, რომ ის ეწინააღმდეგება არათუ ბაქრაძესთან, არამედ სააკაშვილთან შეხვედრასაც კი, რადგან მისი თქმით, ხელისუფლება კომპრომისისთვის არ არის მზად.
”სააკაშვილთან შეხვედრას არავითარი აზრი არ ექნება,”- განაცხადა მან ”იმედის” გადაცემა ”დღის ქრონიკაში” პირდაპირ ეთერში საუბრისას, ”აქ გამოსავალი არის მშვიდობიანი, დემოკრატიული საპროტესტო აქციები, რომელმაც უნდა მიგვიყვანოს რეალურ კომპრომისამდე. ვფიქრობ ამისთვის ისინი [ხელისუფლება] ჯერ მზად არ ჩანან”.
”ჩვენ გვაქვს ინფორმაცია, რომ ისინი არცერთ შეთავაზებაზე წამომსვლელები არ არიან, თვით პირველ არხთან დაკავშირებითაც კი, საუბარი უკვე აღარ არის ვადამდელ არჩევნებზე,”- აღნიშნა გამსახურდიამ.
