საქართველოს ხელისუფლებამ ”გამოხატა მზადყოფნა მომავალ წელს ყველა მერის პირდაპირი წესით არჩევის თაობაზე,” - განაცხადა პრეზიდენტმა სააკაშვილმა გაეროს გენერალური ასამბლეის სხდომაზე გამოსვლისას.

ამ დრომდე ხელისუფლების წარმომადგენლები პირდაპირი წესით მერის არჩევის თაობაზე მხოლოდ თბილისთან დაკავშირებით საუბრობდნენ და არ იყო სავსებით ნათელი, თუ როგორი იყო მმართველი პარტიის პოზიცია მერის პირდაპირი არჩევის თაობაზე სხვა ქალაქებში.

სააკაშვილმა თავის გამოსვლაში ეს საკითხი მაშინ დააყენა, როდესაც ის დემოკრატიული რეფორმების გაღრმავებასთან დაკავშირებით საქართველოს ხელისუფლების ვალდებულებებზე საუბრობდა.

მან ასევე განაცხადა, რომ ხელისუფლება გამოხატავს მზადყოფნას ”დაიწყოს ახალი საარჩევნო წესების შემუშავება სხვადასხვა პოლიტიკურ პარტიებთან კონსენსუსის და შეთანხმების საფუძველზე, რათა უზრუნველყოფილ იქნას შემდგომი ადგილობრივი, საპარლამენტო და საპრეზიდენტო არჩევნების რაც შეიძლება მეტი ლეგიტიმურობა”.

ივლისში პრეზიდენტი სააკაშვილი ადგილობრივი არჩევნების 2010 წლის 30 მაისს ჩატარების ინიციატივით გამოვიდა, ნაცვლად ვადით გათვალისწინებული შემდეგი წლის შემოდგომისა.