დღეს პარლამენტმა მხარი დაუჭირა პარტია თავისუფლების ლიდერის, კონსტანტინე გამსახურდიასთვის სადეპუტატო უფლებამოსილების აღდგენას, რაზეც მან ნებაყოფლობით უარი 2008 წლის ივნისში საპარლამენტო არჩევნების ”გაყალბების” მოტივით თქვა.
გამსახურდიას ხელახლა გადეპუტატება მას შემდეგ გახდა შესაძლებელი, რაც კონსტიტუციაში შეტანილმა ცვლილებამ წლის ბოლომდე ასეთი ერთჯერადი შანსი მისცა იმ პროპორციული წესით არჩეულ 10 ოპოზიციონერ პოლიტიკოსს, რომლებმაც უარი თქვეს მანდატებზე. თუმცა ამ დრომდე მანდატის აღდგენაზე სურვილი გამსახურდიას გარდა არცერთ მათგანს არ გამოუთქვამს.
მიმდინარე კვირაში პარლამენტი ასევე დააკომპლექტებს იმ დროებით კომისიას, რომელიც კონსტანტინე გამსახურდიას მამის, საქართველოს პირველი პრეზიდენტის, ზვიად გამსახურდიას გარდაცვალების გარემოებებს შეისწავლის. ამ კომისიის შექმნა პარტია თავისუფლების ლიდერის პარლამენტში შესვლის გადაწყვეტილებას დაემთხვა.