RSS
Mobile
Twitter
Facebook
საქართველოს და ირანის ორმხრივ ურთიერთობებში ”ახალი ეტაპი” დაიწყო და თბილისი იმედოვნებს, რომ ეს ურთიერთობები კიდევ უფრო გაღრმავდება, განაცხადა საქართველოს საგარეო საქმეთა მინისტრის მოადგილემ ნინო კალანდაძემ 22 მაისს.
მან ეს განცხადება საქართველოს და ირანის საგარეო საქმეთა სამინისტროებს შორის ”მედიის სფეროში თანამშრომლობის შესახებ” ურთიერთგაგების მემორანდუმის ხელმოწერის შემდეგ გააკეთა. მემორანდუმს ხელი მოაწერა ირანის საგარეო საქმეთა სამინისტროს პრესმდივანმა რამინ მეჰმან-ფარასტმა, რომელიც თბილისში ირანელი ჟურნალისტების დელეგაციასთან ერთად ჩამოვიდა.
”საქართველო დიდად მადლიერია ირანის დღევანდელი ხელისუფლების იმ, ჩვენის აზრით, ძალიან გააზრებული პოლიტიკისა საქართველოს მიმართ, რომელსაც ჰქვია საქართველოს ტერიტორიული მთლიანობის და სუვერენიტეტის უპირობო მხარდაჭერა,” - განაცხადა საქართველოს საგარეო საქმეთა მინისტრის მოადგილემ.
”ჩვენ ორმხრივ ურთიერთობებში ახალი ეტაპი დაიწყო, რასაც ჩვენ მივესალმებით და იმედი გვაქვს, რომ გავაღრმავებთ ყველა სფეროში. ამის ნათელი მაგალითია ჩვენი დღევანდელი, პირველი მემორანდუმის გაფორმება,” - დასძინა ნინო კალანდაძემ.
მემორანდუმის ხელმოწერამდე რამინ მეჰმან-ფარასტი საგარეო საქმეთა მინისტრს გრიგოლ ვაშაძეს შეხვდა და ”ორმხრივი საკითხების ფართო სპექტრი” განიხილა, მათ შორის ირანის საგარეო საქმეთა მინისტრის მანუჩარ მოთაქის დაგეგმილი ოფიციალური ვიზიტი საქართველოში.
ირანის საგარეო საქმეთა სამინისტროს პრესმდივანმა 21 მაისს განაცხადა, რომ ვიზიტი სავარაუდოდ ივნისში შედგება, საქართველოს პრემიერ-მინისტრის ნიკა გილაურის თეირანში ვიზიტის შემდეგ. რამინ მეჰმან-ფარასტმა ასევე განაცხადა, რომ ამ მაღალი დონის კონტაქტების დროს ასევე განიხილება ირანის პრეზიდენტ მაჰმუდ აჰმადინეჯადის საქართველოში შესაძლო ვიზიტის დეტალები.
”ირანსა და საქართველოს შორის ურთიერთობები შესანიშნავია,” - განაცხადა მეჰმან-ფარასტმა, ”ჩვენ ძალიან კარგი ურთიერთობა გვაქვს პოლიტიკურ საკითხებში, მაგრამ მიგვაჩნია, რომ უნდა გავაღრმავოთ თანამშრომლობა ეკონომიკურ საკითხებში... განსაკუთრებით ენერგო სექტორში და სოფლის მეურნეობაში”.
თბილისში 21 მაისს გამართულ ირანელი და ქართველი ჟურნალისტების კონფერენციაზე საუბრისას, ირანის ახალმა ელჩმა საქართველოში მაჯიდ საბერმა განაცხადა, რომ ენერგო სექტორში ორმხრივი თანამშრომლობის გაღრმავების დიდი პოტენციალი არსებობს. მისი თქმით, ირანი საქართველოში ჰიდროელექტროსადგურის მშენებლობას გეგმავს, ამასთან მისი თქმით, ქართულმა მხარემ სთხოვა ირანს ქარის ენერგიის განვითარებაში არსებული გამოცდილება გაუზიაროს.
