დღეს ირაკლი ალასანიას პარტიის, ჩვენი საქართველო–თავისუფალი დემოკრატების წევრებმა სახელმწიფო საკონსტიტუციო კომისიას წარუდგინეს წინადადებები, რომელიც ითვალისწინებს პრეზიდენტობის შემდეგ მიხეილ სააკაშვილის მიერ პრემიერ–მინისტრის პოსტის დაკავებაზე შეზღუდვის დაწესებას კონსტიტუციაში.

პარტიის წევრის, თეა წულუკიანის თქმით, კონსტიტუციაში უნდა აისახოს დებულება, რომლის მიხედვითაც "საქართველოს პრეზიდენტი, რომელსაც ან შეუწყდება უფლებამოსილება ან ამოეწურება უფლებამოსილება, მომდევნო გარკვეული პერიოდის განმავლობაში ვერ იქნეს წარდგენილი პრემიერ–მინისტრობის კანდიდატად“.

მისი თქმით, პარტიის შეთავაზებაა, რომ ეს პერიოდი განისაზღვროს ხუთი წლით და იქვე დასძინა რომ პირისთვის პოლიტიკური თანამდებობის დაკავების სამუდამოდ აკრძალვა მისი უფლებების დარღვევა იქნებოდა.

“დამატება უნდა შევიდეს კონსტიტუციაში, რომ მომავალში  საქართველოს პრეზიდენტი მიხეილ სააკაშვილი არ მოგვევლინოს პრემიერ–მინისტრად. ეს არის ძალიან მნიშვნელოვანი, რომ არ მოხდეს ხელისუფლების უზურპაცია,“– განაცხადა თბილისის საკრებულოს წევრმა "თავისუფალი დემოკრატებიდან“ ზურაბ აბაშიძემ.

ანალოგიური ინიციატივით ცოტა ხნის წინ ლეიბორისტული პარტიაც გამოვიდა.

ვარაუდები იმის თაობაზე, რომ მიხეილ სააკაშვილმა 2013 წელს მისი საპრეზიდენტო ვადის ამოწურვის შემდეგ შესაძლოა პრემიერ–მინისტრის პოსტი დაიკავოს მას შემდეგ გაჩნდა, რაც საკონსტიტუციო კომისიამ მიიღო საბაზისო პროექტი, რომლის მიხედვითაც პრემიერ–მინისტრს, პრეზიდენტის გარკვეული უფლებამოსილებების შეკვეცის ხარჯზე, ეზრდება მმართველობის ბერკეტები.