დევნილების იძულებით გამოსახლების პროცესი დღეს დილიდან მიმდინარეობს თბილისში, ამიერკავკასიაში რუსეთის სამხედრო დაჯგუფების ყოფილი შტაბის შენობიდან.

გამოსახლების პროცესში პოლიციაც არის ჩართული ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროსთან ერთად.

ზოგიერთი დევნილის განცხადებით, რომლებიც, ძირითადად, 2008 წლის აგვისტოს ომის შედეგად იძულებით გადაადგილებულ ოჯახებს წარმოადგენენ, მათ გამოსახლების შესახებ მხოლოდ მიმდინარე კვირაში შეიტყვეს, ხოლო  განსახლების ახალ ადგილზე შეთავაზება არ მიუღიათ.

საინფორმაციო სააგენტო "ინტერპრესნიუსი" იტყობინება, რომ დევნილების ნაწილს ზუგდიდის რაიონის სოფლებში ორულსა და ფოცხოში სთავაზობენ საცხოვრებელ სახლებს, თუმცა ამაზე უარს ამბობენ და საცხოვრებლით დაკმაყოფილებას თბილისის მასშტაბით ითხოვენ. 

ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროში ხელმიუწვდომელია ინფორმაცია იმის თაობაზე, შესთავაზეს თუ არა გამოსახლებულ დევნილებს ალტერნატიული ფართები.

დევნილთა გამოსახლების ერთ–ერთი ბოლო შემთხვევა თბილისში გამომცემლობა „სამშობლოს“ შენობიდან მოხდა, რომლის დროსაც სამინისტრომ მათ ზუგდიდში საცხოვრებლად გადასვლა შესთავაზა. თუმცა დევნილები ამ შეთავაზების წინააღმდეგნი იყვნენ დასაქმების ნაკლები პერსპექტივის გამო.

დევნილთა მდგომარეობის შესახებ Amnesty International–ის ანგარიშის თანახმად, რომელიც 5 აგვისტოს გამოქვეყნდა, 2009 წლის ბოლოსათვის კოლექტიურ დასახლებებში მცხოვრებ დევნილთა 65%–ს დაუკანონდა კერძო საკუთრებაში საცხოვრებელი ფართები, თუმცა იმავდროულად ადგილი ჰქონდა შენობების პრივატიზაციის გამო დევნილთა კოლექტიური ცენტრებიდან იძულებით გამოსახლების შემთხვევებსაც.