დევნილებისა და გარე მოვაჭრეების საპროტესტო აქციაზე, პარლამენტის წინ აქციის მონაწილეებსა და პოლიციას შორის ფიზიკური დაპირისპირება მოხდა.

აქციის მონაწილეთა განცხადებით, პოლიციამ ხალხის პარტიის ერთ–ერთი ლიდერი ალექსანდრე შალამბერიძე და მოძრაობა „არა“–ს წარმომადგენელი ლევან ჩიტაძე დააკავა.

ტელეკომპანიების "მაესტროსა“ და "კავკასიის“ მიერ გავრცელებული ვიდეომასალის თანახმად, პოლიციას ასევე ჰქონდა მცდელობა დაეკავებინა კონსერვატიული პარტიის წარმომადგენელი ლაშა ჩხარტიშვილი, თუმცა აქციის მონაწილეებმა სამართალდამცავებს მისი დაკავება არ დაანებეს. ჩხარტიშვილის დაკავების მცდელობისას პოლიციასა და აქციის მონაწილეებს შორის ფიზიკურ შეხლა–შემოხლას ჰქონდა ადგილი, ტროტუართან ახლოს, გზის სავალ ნაწილზე. დაპირისპირების დროს რუსთაველის გამზირზე სამანქანო მოძრაობა არ შეჩერებულა, თუმცა შეფერხებული იყო. 

არცერთ ნაციონალურ ტელეკომპანიას დღის გამოშვებებში არ გაუშუქებია რუსთაველის გამზირზე მომხდარი დაპირისპირება.

ლაშა ჩხარტიშვილის განცხადებით, "აბსოლუტურად კანონიერი“ აქციის ორგანიზატორი იყო ის და არა დაკავებული შალამბერიძე ან ჩიტაძე. "მოვითხოვთ მათ გათავისუფლებას,“– განაცხადა ჩხარტიშვილმა, "თუკი ვინმე უკანონოდ უნდა იყოს დაპატიმრებული, ეს მე ვარ“.

დაპირისპირების ადგილას ასევე იმყოფებოდა თბილისის საპატრულო პოლიციის უფროსი გიორგი გეგეჩკორი. მან ჟურნალისტებთან კომენტარის გაკეთება არ ისურვა და პოლიციას აძლევდა განკარგულებას აქციის მონაწილეები ტროტუარიდან გზის სავალ ნაწილზე არ დაეშვათ. 

დევნილებისა და გარე მოვაჭრეების აქციებმა ბოლო დროს დევნილების ნაწილის კომპაქტური ჩასახლების ადგილებიდან გამოსახლებისა და თბილისში გარე ვაჭრობის აკრძალვის შემდეგ პერმანენტული სახე მიიღო.

დღევანდელი აქცია პრეზიდენტის რეზიდენციასთან დაიწყო, საიდანაც აქციის მონაწილეებმა მანიფესტაციით პარლამენტის შენობის წინ გადაინაცვლეს.

იმავდროულად, თბილისის საკრებულოს ჯანდაცვისა და სოციალური საკითხების კომისიის თავმჯდომარემ ვიქტორ დოლიძემ, ჩვენი საქართველო – თავისუფალი დემოკრატებიდან, დღეს საგანგებო ბრიფინგზე განაცხადა, რომ იგი სამეგრელოს იმ სოფლებს სტუმრობდა, სადაც გამოსახლებული დევნილების ნაწილს საცხოვრებელ ფართებს სთავაზობენ. მისი ინფორმაციით, დევნილებისთვის შეთავაზებულ შენობებში არ არის ელექტროენერგია გაყვანილი, არ არის სკოლა და სასოფლო–სამეურნეო მიწები.  

“ელემენტარული საცხოვრებელი პირობები იქ არ არსებობს... შეუძლებელია მოსახლეობისთვის იქ ყოფნა,“– განაცხადა დოლიძემ.

თუმცა ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს განცხადებით, დოლიძის ინფორმაცია იმის შესახებ, რომ დევნილებისთვის შეთავაზებულ ალტერნატიულ ფართებში "ურთულესი" პირობებია, სიმართლეს არ შეესაბამება.