ათ დღეზე მეტია, რაც აფხაზეთიდან დევნილი შვიდი ადამიანი შიმშილობს ოკუპირებული ტერიტორიებიდან იძულებით გადაადგილებულ პირთა, განსახლების და ლტოლვილთა სამინისტროს წინ;  ოთხმა დევნილმა კი პროტესტის უკიდურეს ზომას მიმართა და პირი ამოიკერა.

სხვა დევნილების მსგავსად, რომლებიც ბოლო კვირების განმავლობაში გამოასახლეს სამართალდამცავებმა თბილისში სახელმწიფო საკუთრებაში არსებული შენობებიდან, მოშიმშილეები ხელისუფლებისგან თბილისის ნებისმიერ უბანში საცხოვრებელი ფართის გამოყოფას ითხოვენ და არ აპირებენ პროტესტის შეწყვეტას მათი მოთხოვნის დაკმაყოფილებამდე.

მოშიმშილეთა განცხადებით, მათთვის სამინისტროს არანაირი ფულადი კომპენსაცია ან ალტერნატიული ფართი არ შეუთავაზებია და არც არავინ გამოსულა მათთან კონტაქტზე. სამინისტროს წარმომადგენლები კომენტარისთვის ხელმიუწვდომელნი აღმოჩნდნენ.

"არანაირი შეთავაზება არ ყოფილა, სადაც გინდათ იქ წადითო ასე განგვიცხადეს,“– განაცხადა ერთ–ერთმა დევნილმა.

დევნილების გამოსახლებამ მასიური ხასიათი ივლისის ბოლოსა და აგვისტოში მიიღო, როცა პოლიციამ ასობით დევნილი გამოასახლა თბილისში მდებარე მათი კოლექტიური ჩასახლების ცენტრებიდან. გამოსახლების პროცესი სახალხო დამცველმა და გაეროს ლტოლვილთა კომისარიატმა გააკრიტიკა. 

ამან ასევე გამოიწვია საპროტესტო აქციების სერია. უკანასკნელი ასეთი აქცია თბილისის საკრებულოს წინ 26 აგვისტოს გაიმართა და წინამორბედების მსგავსად, ორგანიზებული იყო კონსერვატიული და ხალხის პარტიების მიერ. განსხვავებით 20 აგვისტოს აქციისგან, როცა ადგილი ჰქონდა პოლიციასა და მომიტინგეებს შორის დაპირისპირებას, დღევანდელი აქცია მშვიდობიანად დაიშალა. აქციის მონაწილეთა განცხადებით, ისინი 27 აგვისტოსაც აპირებენ  საკრებულოს შენობის წინ შეკრებას, როცა საკრებულოს დეპუტატები მათ პრობლემებზე იმსჯელებენ.

ხელისუფლებამ გამოსახლებული დევნილების ნაწილს წალენჯიხის რაიონის სოფელ ფოცხო–ეწერში ჩასახლება შესთავაზა. თუმცა დევნილები თავს იკავებენ ამ წინადადების მიღებისგან იმ მოტივით, რომ მათ იქ დასაქმების ნაკლები პერსპექტივა ექნებათ.

სახალხო დამცველის აპარატმა ფოცხო–ეწერში მონიტორინგი განახორციელა, რომლის თანახმადაც ჩასახლებულ დევნილთა 13 ოჯახს, მიუხედავად იმისა, რომ საცხოვრებელი ფართები რეაბილიტირებულია, არ მიეწოდებათ ელექტროენერგია და ბუნებრივი აირი, დაზიანებულია იატაკი, არ აქვთ საკვები პროდუქტები, მედიკამენტები, პირველადი მოხმარების საყოფაცხოვრებო ნივთები და ავეჯი.