ტყიბულის ქვანახშირის მაღაროში გუშინ მომხდარი აფეთქების შედეგად სამი ადამიანი დაიღუპა და შვიდი მძიმედ დაშავდა.

დაშავებული შვიდივე მაღაროელი ამჟამად თბილისშია ჰოსპიტალიზებული; ექიმების განცხადებით, მათი მდგომარეობა მძიმეა, თუმცა არა სიცოცხლისთვის საშიში.  

შინაგან საქმეთა მინისტრმა ვანო მერაბიშვილმა, რომელიც აფეთქების ადგილას ჩავიდა, განაცხადა, რომ მომხდარს სამართალდამცავები იძიებენ.

"გამოძიება დაადგენს და შემდგომ გადაწყვეტილებებს მიიღებს მაღაროს ხელმძღვანელობა ექსპლუატაციის ახალი ნორმების თუ სხვა ნორმების შემოღებაზე, რომელიც თავიდან აგვაცილებს ასეთ საფრთხეებს," – განუცხადა ჟურნალისტებს მერაბიშვილმა. 

იმერეთის გუბერნატორის ლაშა მაქაცარიას განცხადებით, წინასწარი მონაცემებით, აფეთქება მეთანის გაზის აალებამ გამოიწვია. 

ბოლოს ტყიბულის მაღაროში ანალოგიური მიზეზით მარტში მომხდარმა აფეთქებამ ოთხი ადამიანის სიცოცხლე შეიწირა.