გაეროს გენერალური ასამბლეის ფარგლებში პრეზიდენტი სააკაშვილი 23 სექტემბერს ნიუ–იორკში თავის კოლეგებს შეხვდა ლიტვიდან, სენეგალიდან, კვიპროსიდან და ყირგიზეთიდან.

მანამდე, ასევე გაეროს გენერალური ასამბლეის ფარგლებში, სააკაშვილმა ხორვატიის და ფინეთის პრეზიდენტებთან გამართა მოლაპარაკებები.

საქართველოს პრეზიდენტის ადმინისტრაციის ინფორმაციით, კვიპროსის პრეზიდენტთან დიმიტრიოს ქრისტოფიასთან შეხვედრაზე სახელმწიფო ლიდერებმა იმსჯელეს აფხაზეთიდან და ცხინვალის რეგიონიდან იძულებით გადაადგილებულ პირთა და დევნილთა შესახებ გაეროს რეზოლუციაზე, რომელსაც კენჭის ყრის დროს  კვიპროსმა მხარი არ დაუჭირა.

"საქართველოს პრეზიდენტმა მიხეილ სააკაშვილმა სწორედ იმის გამო ჩათვალა საჭიროდ შეხვედროდა კვიპროსის პირველ პირს, რომ მხარეთა შორის საუბარი შემდგარიყო სამომავლო ურთიერთობისა და თანამშრომლობის შესახებ,“ – განაცხადა პრეზიდენტის ადმინისტრაციამ.

სენეგალის პრეზიდენტთან შეხვედრის შემდეგ პრეზიდენტმა სააკაშვილმა განაცხადა, რომ მან სენეგალელი კოლეგა საქართველოში დაპატიჟა.