29 სექტემბერს, დილიდან რუსეთის საოკუპაციო ჯარებმა შიდა ქართლში დამატებითი ტერიტორიის დაკავება და ცხინვალის რეგიონის მიმდებარე ხუთ სოფელში ოკუპაციის ხაზის წინ გადმოწევა დაიწყეს, იტყობინება საქართველოს შინაგან საქმეთა სამინისტრო.
სამინისტროს ცნობით, რუსეთის უშიშროების ფედერალური სამსახურის დანაყოფები უკანონო „საზღვრის სადემარკაციო სამუშაოებს" ატარებენ, კერძოდ კი, არმატურის ძელებს არჭობენ სოფლებში: ქვემო ნიქოზი, ზემო ნიქოზი, დიცი, არბო და ქორდი.
შსს აცხადებს, რომ სოფელ ქვემო ნიქოზში "მიტაცებულია“ 25 ჰექტარი სასოფლო-სამეურნეო მიწა; სოფელ დიცში უკანონო მონიშვნის იქით აღმოჩნდა 3 ოჯახის კუთვნილი სახლები და ერთ-ერთი ოჯახის ხეხილის ბაღის ნახევარი, ასევე საძოვრები, სარწყავი არხი და ახალგაკეთებული წყლის ჭაბურღილი; სოფელ არბოში კი დაიკავეს მოსახლეობის კუთვნილი 5 ჰექტარი სასოფლო-სამეურნეო ნაკვეთები; ხოლო სოფელ ქორდში ნახევარი ჰექტარი კერძო სასოფლო-სამეურნეო ნაკვეთი.
"ამჟამად, უკანონო "დემარკაცია" მიმდინარეობს სოფელ ზემო ნიქოზშიც,“– ნათქვამია შსს–ს განცხადებაში.
ევროკავშირის სადამკვირვებლო მისიის წარმომადგენელმა განუცხადა Civil.ge–ს, რომ ადგილზე ვითარება იყო "მშვიდი და წყნარი". მან ასევე აღნიშნა, რომ მისიას მოცემულ ეტაპზე დეტალებზე საუბარი არ შეუძლია, ვინაიდან ევროპელი დამკვირვებლები ამჟამად სწავლობენ ვითარებას.