რუსეთის საგარეო საქმეთა მინისტრმა სერგეი ლავროვმა განაცხადა, რომ ის გზა, რომლითაც საქართველომ გაამარტივა სავიზო რეჟიმი ჩრდილოთ კავკასიის შვიდ რესპუბლიკაში მცხოვრები რუსეთის მოქალაქეებისთვის, არის თბილისის "პროპაგანდის“ ნაწილი.

პრეზიდენტმა სააკაშვილმა ორშაბათს ხელი მოაწერა განკარგულებას, რომლის თანახმადაც 13 ოქტომბრიდან ჩეჩნეთის, ინგუშეთის, ჩრდილოეთ ოსეთის, დაღესტნის, ყაბარდო-ბალყარეთის, ყარაჩაი-ჩერქეზეთისა და ადიღეს რესპუბლიკებში ჩაწერილი რუსეთის მოქალაქეებისთვის 90 დღიანი უვიზო რეჟიმი ამოქმედდება საქართველო საზღვრის გადაკვეთისას.

საქართველოს პრეზიდენტის ადმინისტრაციამ განაცხადა 12 ოქტომბერს, რომ ამგვარი ქმედება თბილისის „ერთიანი კავკასიის“ პოლიტიკის ნაწილია, რომლის პრიორიტეტებიც პრეზიდენტმა სააკაშვილმა 23 სექტემბერს გაეროს გენერალური ასამბლეის სხდომაზე გაახმოვანა.

ლავროვმა განაცხადა, რომ რუსეთის საგარეო უწყებას არ მიუღია შეტყობინება ამგვარი ქმედების თაობაზე და მოსკოვმა თბილისის გადაწყვეტილების შესახებ მედიის მიერ გავრცელებული ინფორმაციიდან შეიტყო.

"იმ ურთიერთობების ფარგლებში, რომლებიც ცივილიზებულ პარტნიორებს შორის არსებობს, ამის განხილვა მიღებულია ორმხრივ საფუძველზე,“ – იტყობინება "რია ნოვოსტი“ ლავროვის სიტყვებზე დაყრდნობით 12 ოქტომბერს, "ის გზა, რომლითაც ამის გაკეთებას აპირებენ, უფრო მეტად კიდევ ერთ პროპაგანდისტულ ნაბიჯს გვაგონებს“.

რუსეთის საგარეო საქმეთა მინისტრის საპასუხოდ, რომ თბილისმა ცალმხრივად მიიღო გადაწყვეტილება რუსული მხარის ინფორმირების გარეშე, საქართველოს საგარეო საქმეთა მინისტრმა, გრიგოლ ვაშაძემ 12 ოქტომბერს განაცხადა: "საქართველო არის სუვერენული სახელმწიფო. ჩვენ თვითონ ვწყვიტავთ რა სავიზო რეჟიმი გვექნება სხვა ქვეყნის მოქალაქეებისთვის“. 

იმავრდოულად, პრეზიდენტ სააკაშვილის პრესსპიკერმა მანანა მანჯგალაძემ განაცხადა 12 ოქტომბერს, რომ ეს გადაწყვეტილება კავკასიელ ხალხებს შორის დიალოგის გაღრმავებას ისახავს მიზნად.

"სულ რამდენიმე დღის წინ საქართველოს პრეზიდენტმა გაეროს გენერალური ასამბლეის  სხდომაზე  მნიშვნელოვანი ინიციატივა გააცხადა - ერთიანი  კავკასიის შესახებ,“ – აღნიშნა მანანა მანჯგალაძემ, "ეს გადაწყვეტილებაც,  ბუნებრივია კავშირშია პრეზიდენტის ამ ინიციატივასთან და კავკასიელ ხალხებს შორის დიალოგის გაღრმავებისკენ არის მიმართული“.

ჩრდილო კავკასიის რესპუბლიკებში მცხოვრებ მოსახლეობას საქართველოს ვიზის აღება საქართველოში ჩამოსვლისას ან მოსკოვში შვეიცარიის საელჩოში უწევდა.

საქართველოს ვიზები ყაზბეგი–ზემო ლარსის სასაზღვრო–გამშვებ პუნქტზე არ გაიცემა. ორ ქვეყანას შორის არსებული ეს სასაზღვრო–გამშვები პუნქტი 2010 წლის მარტში გაიხსნა. ოფიციალური თბილისის განმარტებით, ამ შეზღუდვის გამო, ჩრდილოეთ კავკასიის რესპუბლიკების მოსახლეობისთვის რთულია საქართველოში სახმელეთო გზით შემოსვლა, ვინაიდან მათ ჯერ მოსკოვში უწევთ ვიზის ასაღებად ჩასვლა.

ეს საკითხი 12 ოქტომბრის პარლამენტის სხდომის ხანმოკლე განხილვის საგანი გახდა. დეპუტატები ქრისტიან–დემოკრატიული მოძრაობიდან აცხადებდნენ, რომ ამ გადაწყვეტილებამ უსაფრთხოებასთან დაკავშირებული პრობლემები წამოჭრა და საჭირო იყო მისი ეროვნული უშიშროების საბჭოს გაფათოებულ სხდომაზე განხილვა.

ხელისუფლებამ უარყო ამ პრობლემების არსებობა. პრეზიდენტის პრესსპიკერმა განაცხადა: "უსაფრთხოება რეგიონში არა ვიზის გაცემით ან არგაცემით, არამედ სრულიად განსხვავებული მეთოდებითა და საშუალებებით  კონტროლდება“.