საპარლამენტო კომიტეტები მიმდინარე კვირაში "თავისუფლების ქარტიის“ განხილვას გეგმავენ, რომელიც ე.წ. პატრიოტის აქტთან და ლუსტრაციის დებულებებთან ერთად საბჭოთა და ფაშისტური სიმბოლიკის აკრძალვასაც ითვალისწინებს.

კანონპროექტის მიხედვით, კომუნისტური თუ ფაშისტური სიმბოლიკის, საკულტო ნაგებობების, ძეგლების, მონუმენტების, ქუჩების სახელწოდებების თუ სხვა იდეოლოგიის და პროპაგანდის მატარებელი საშუალებების შესახებ ინფორმაციას აგროვებს და მათი აღმოფხვრის შესახებ გადაწყვეტილებებს იღებს სპეციალური კომისია, რომელსაც პრეზიდენტი პარლამენტის ფრაქციათა წარმომადგენლების მონაწილეობით ქმნის. აღნიშნული კომისია მუშაობს ასევე ლუსტრაციის თემატიკაზეც.

კანონპროექტის ინიციატორია საპარლამენტო უმცირესობის ფრაქცია ძლიერი საქართველოს თავმჯდომარე და დემოკრატიული პარტიის ლიდერი გია თორთლაძე.

მან გასული წლის დეკემბერში "თავისუფლების ქარტიის“ სახელწოდების ქვეშ გააერთიანა მის მიერ ადრე ინიცირებული ორი კანონპროექტი ე.წ. პატრიოტის აქტის და ლუსტრაციის შესახებ.

შედეგად, წარმოდგენილი საკანონმდებლო ინიციატივა მოიცავს ანტიტერორისტული ღონისძიებების პაკეტს, რომელიც ითვალისწინებს სტრატეგიული შენობა-ნაგებობების დაცვას და ვიდეო–თვალთვალს, ოკუპირებულ ტერიტორიებთან ე.წ. პირობითი საზღვრის განსაკუთრებულ მონიტორინგს, საქართველოში შემოსული ტვირთებისა და 10 ათას ლარს ზევით ფინანსური გადარიცხვების მონიტორინგს; ხოლო ლუსტრაციის ნაწილში იგი ითვალისწინებს 1991 წლის 9 აპრილამდე პერიოდში ყოფილი სსრკ-ის სპეცსამსახურების თანამშრომლებისთვის, კომუნისტური პარტიისა და კომკავშირის მაღალჩინოსნებისთვის თანამდებობრივი შეზღუდვების დაწესებას. 

აღნიშნული კანონპროექტი პირველი მოსმენით პარლამენტის იურიდიულმა კომიტეტმა მარტში განიხილა, თუმცა ვინაიდან საბჭოთა სიმბოლიკის აკრძალვასთან დაკავშირებული ახალი დებულებები დაემატა, მასზე იურიდიულ საკითხთა, ადამიანის უფლებათა დაცვის და თავდაცვისა და უშიშროების  კომიტეტების გაერთიანებულ სხდომაზე ხელახლა იმსჯელებენ.