პარლამენტმა 26 ოქტომბერს მესამე და საბოლოო მოსმენით მიიღო კანონპროექტი, რომელიც ნაწილობრივ ათავისუფლებს გადასახადებისგან იმ ინვესტიციებს, რომლებიც ქობულეთში 11.4 ჰექტარზე სასტუმროების მშენებლობაში ჩაიდება.
კანონის თანახმად, ინვესტორი, რომელიც სულ ცოტა 1 მილიონ ლარს ჩადებს ქობულეთში სასტუმროს მშენებლობაში, მომდევნო 15 წლის მანძილზე მოგების და ქონების გადასახადისგან გათავისუფლდება. თავდაპირველი ინიციატივა, რომელიც პრეზიდენტმა სააკაშვილმა სექტემბერში გამოაცხადა, ითვალისწინებდა რომ სასტუმროს მშენებლობა ინვესტორს 2011 წლის 1 აგვისტომდე უნდა დაესრულებინა და მხოლოდ ამ შემთხვევაში მიიღებდა ის საგადასახადო შეღავათებს.
თუმცა, შემდეგ ეს შემოთავაზება შეიცვალა და გადაწყდა, რომ საბოლოო ვადებს თითოეული ინდივიდუალური შემთხვევისთვის სპეციალური სახელმწიფო კომისია განსაზღვრავს.
ინვესტორები, რომლებიც მზად არიან სულ ცოტა 1 მილიონი ლარი ჩადონ მშენებლობაში, შეძლებენ ნაკვეთის აღებას ე.წ. ქობულეთის თავისუფალ ტურისტულ ზონაში, "სიმბოლურ 1 ლარად“, ნათქვამია მიღებულ კანონში.
მთავრობა ვალდებულებას იღებს ყველა საჭირო ინფრასტრუქტურა უზრუნველყოს ტერიტორიაზე, მათ შორის გაზის, წყლის, ელექტროენერგიის და გზის მიყვანა.