რუსეთის საგარეო საქმეთა მინისტრმა სერგეი ლავროვმა განაცხადა, რომ მოსკოვი არ დაუჭერს მხარს ეუთოს ასტანას სამიტის საბოლოო დეკლარაციას, თუ მასში შევა ფორმულირება "კონფლიქტი საქართველოში,“ რადგანაც ეს აფხაზეთის და სამხრეთ ოსეთის საქართველოს ნაწილებად ცნობის ტოლფასი იქნება.

"ჩვენ მზად ვართ სამიტის საბოლოო დოკუმენტებში აქტიურად და დეტალურად დავუჭიროთ მხარი ჟენევის დისკუსიების მუშაობას. მაგრამ ვერ დავეთანხმებით იმას, რომ ეს დისკუსიები ეძღვნება "კონფლიქტებს საქართველოში,“ როგორც ამის გაკეთებას ზოგიერთი ჩვენი დასავლელი კოლეგა გვთავაზობს,“ – იტყობინებიან "რია ნოვოსტი“ და "ინტერფაქსი“ ლავროვის სიტყვებზე დაყრდნობით.

1 დეკემბერს ასტანაში ეუთოს სამიტზე გამოსვლისას რუსეთის პრეზიდენტმა დიმიტრი მედვედევმა მოკლედ ახსენა საქართველო და განაცხადა: "ძალის გამოყენება, რისი მცდელობაც საქართველოს ხელმძღვანელობას ჰქონდა სამხრეთ ოსეთის წინააღმდეგ 2008 წლის აგვისტოში, აბსოლუტურად მიუღებელია“.