ეროვნული ბანკის პროგნოზით, წლის ბოლოსთვის წლიური ინფლაციის მაჩვენებელი 10.6%–მდე გაიზრდება, რაც 2007 წლის შემდეგ ყველაზე მაღალი მაჩვენებელი იქნება.

ეროვნული ბანკის მიერ 30 ნოემბერს გამოქვეყნებულ ფინანსური სტაბილურობის ანგარიშში ნათქვამია, რომ ინფლაციის მაღალი დონე გარეშე ფაქტორებს, ძირითადად კი საკვებზე ფასების ზრდას უკავშირდება.

"მსოფლიოში ხორბლის მოსავლის გაფუჭებასთან დაკავშირებით გაიზარდა ხორბლის საერთაშორისო ფასი, რაც სავარაუდოდ, ასევე აისახება საქართველოში პურპროდუქტების და ბურღულეულის ფასებზე, აგრეთვე იმ პროდუქტების ფასზე, რომელთა წარმოებაც უშუალოდ არის დაკავშირებული ხორბალზე, კერძოდ, ხორცპროდუქტებზე, რძის ნაწარმზე, კვერცხზე და მზესუმზირის ზეთზე,“ – ნათქვამია ანგარიშში.

ბოლოს ინფლაციის ორნიშნა მაჩვენებელი 2007 წელს დაფიქსირდა, როდესაც ინფლაციის დონემ 11%–ი შეადგინა.

ფინანსთა მინისტრმა კახა ბაინდურაშვილმა განაცხადა 12 ნოემბერს, რომ მთავრობას მოუწია ინფლაციის საპროგნოზო მაჩვენებლის გადახედვა და მისი გაზრდა 6%–დან 9%–მდე.

წლიურმა ინფლაციამ ოქტომბერში 9.6% შეადგინა (სექტემბერში 9.8%). ეროვნული ბანკი ნოემბრის ინფლაციის მაჩვენებელს მომავალ კვირას გამოაქვეყნებს.