ტელეკომპანია "მაესტრომ“ 23 დეკემბერს მაუწყებლობა შეაჩერა და ამის მიზეზად "ტექნიკური პრობლემები“ დაასახელა.

ტელეკომპანია "მაესტრომ“, რომელიც ძირითადად საინფორმაციო გამოშვებებს, თოქ-შოუებს და ასევე ჟურნალისტურ გამოძიებებს გადასცემს, მაუწყებლობა 23 დეკემბერს დილის 7 საათზე შეწყვიტა.

ტელეკომპანიის დირექტორმა კახა ბექაურმა გაზეთ "რეზონანსს“ განუცხადა, რომ მაუწყებლობის შეჩერების მიზეზი "ტექნიკური პრობლემაა“, რომლის დეტალებზეც მან არ ისაუბრა. თუმცა, მან ასევე აღიარა, რომ "ტექნიკური პრობლემა“ ასევე უკავშირდება ფინანსურ სირთულეებს. მან ვერ დაასახელა კონკრეტული თარიღი, თუ როდის განაახლებს ტელეკომპანია მაუწყებლობას.

მაუწყებლობის შეწყვეტამ მედიაში ვარაუდები გამოიწვია იმასთან დაკავშირებით, რომ ეს უკავშირდებოდა ტელეკომპანიის ფინანსურ პრობლემებს, რაც მისი მენეჯმენტიდან ეროსი კიწმარიშვილის, "რუსთავი 2"–ის ყოფილი თანამფლობელის და ქართული პარტის ერთ–ერთი ლიდერის წასვლას მოყვა.

კიწმარიშვილის მიერ დაარსებულ კომპანიას "მაესტროს" მენეჯმენტი სამი წლის ვადით 2009 წლის ნოემბერში გადაეცა. 2010 წლის მარტში კიწმარიშვილმა კახა ბექაური ტელეკომპანიის ახალ დირექტორად დანიშნა, რომელსაც ტელევიზიის ყოველდღიური მენეჯმენტი ჩააბარა. მას შემდეგ კიწმარიშვილმა რამდენჯერმე განაცხადა, რომ ამ დანიშვნის შემდეგ მას აღარაფერი აქვს საერთო "მაესტროსთან“. ბექაურმა 23 დეკემბერს განაცხადა, რომ უკვე თვეებია, რაც კიწმარიშვილი ტელეკომპანიის საქმეებში აღარ მონაწილეობს და რომ მაუწყებლობის შეწყვეტა კიწმარიშვილს არ უკავშირდება.

2010 წლის მაისში "მაესტრომ“ განახლებული სტუდიებით და ახალი პროგრამებით დაიწყო სატელიტური მაუწყებლობა. თუმცა, რამოდენიმე თვეში ტელეკომპანიამ შეწყვიტა სატელიტური მაუწყებლობა და ამის მიზეზად ფინანსური პრობლემები დაასახელა.