ოპოზიციური ქართული პარტიის ლიდერმა სოზარ სუბარმა განაცხადა, რომ მისი პარტია „რეჟიმის შესაცვლელად გადამწყვეტ ბრძოლას“ 25 მაისს დაიწყებს, რომელიც, მისი თქმით, "ქართველი ხალხის მრისხანების დღე“ უნდა გახდეს.

მისი თქმით, სახალხო კრებასთან წარსული ურთიერთობები არ არის მნიშვნელოვანი, არამედ მნიშვნელობა აქვს იმას თუ რა იქნება მომავალში.

„გუშინ და დღეს ხელისუფლებამ გადალახა ყველა ზღვარი და დაიწყო ჩვეული ტერორი ხალხის წინააღმდეგ... ხალხის ნება და ხალხის აზრი მისთვის არაფერს წარმოადგენს. დაიწყო დარბევა მშვიდობიანი მომიტინგეების, უკანონო დაპატიმრებები, ოფისებში შეჭრა და ასე შემდეგ... სწორედ ამიტომ დღეს ქართული პარტია იწყებს გადამწყვეტ ბრძოლას რეჟიმის შეცვლისთვის. მოვუწოდებთ მთელ საქართველოს, ყველა პოლიტიკურ ძალას, ვისთვისაც მნიშვნელოვანია ქვეყნის ბედი, რომ 25 მაისს, 12 საათზე შევიკრიბოთ თბილისში ავლაბრის მოედანზე და დავიწყოთ გადამწყვეტი ბრძოლა ქვეყნის გადასარჩენად,“ – განაცხადა სუბარმა.

"25 მაისი უნდა ვაქციოთ ქართველი ხალხის მრისხანების დღედ, იმ დღედ, როდესაც ქართველი ხალხი სააკაშვილს და მის კრიმინალურ რეჟიმს დაამთავრებს და გაუშვებს იქ, სადაც არის მათი ადგილი... 25 მაისი უნდა გადაიქცეს ქართველი ხალხის ნამდვილი დამოუკიდებლობის დღედ,“ – განაცხადა მან.

საქართველოს მთავრობა 26 მაისს საქართველოს დამოუკიდებლობის დღის აღნიშვნას რუსთაველის გამზირზე სამხედრო აღლუმით გეგმავს.

სუბარის განცხადების შემდეგ ქართული პარტიის კიდევ ერთი ლიდერი და თანადამფუძნებელი ლევან გაჩეჩილაძე საზოგადოებრივი მაუწყებლის წინ მიმდინარე აქციას შეუერთდა. გაჩეჩილაძეს ნინო ბურჯანაძესთან დაპირისპირება ჰქონდა.

აქციის ადგილზე მისვლის შემდეგ, სადაც ასევე იმყოფებოდა ნინო ბურჯანაძე, გაჩეჩილაძემ მიმართა მომიტინგეებს, რომ „მე პირადად, ლევან გაჩეჩილაძე, ვივიწყებ ყველაფერს ჩემი სამშობლოს გულისთვის“, რის შემდეგაც მან ბურჯანაძეს ხელი ჩამოართვა და გადაკოცნა მომიტინგეების თვალწინ.