სეპარატისტული აფხაზეთის პრემიერ–მინისტრმა სერგეი შამბამ განაცხადა, რომ მას აქვს "განზრახვა“ 26 აგვისტოს დაგეგმილ ვადამდელ საპრეზიდენტო არჩევნებში მიიღოს მონაწილეობა.

17 ივნისს რუსულ ვებგვერდ Lenta.ru–სთან ინტერვიუში შამბამ ასევე განაცხადა, რომ საბოლოო გადაწყვეტილების შესახებ მხოლოდ მას შემდეგ განაცხადებს, რაც 27 ივნისიდან კანდიდატების ოფიციალური წარდგენა დაიწყება.

კითხვაზე, თუ რამდენად რეალურია პრეზიდენტის მოვალეობის შემსრულებელთან ალექსანდრე ანქვაბთან ძალების გაერთიანება მომავალი არჩევნების დროს, შამბამ უპასუხა: "არა მგონია, ეს რეალური იყოს“.

ანქვაბი სეპარატისტული რეგიონის პრეზიდენტობის პოტენციურ კანდიდატად მოიაზრება, თუმცა ზოგიერთი ექსპერტი ვარაუდობს, რომ შამბა და ანქვაბი შესაძლოა გაერთიანდნენ და ერთ–ერთი მათგანი ვიცე–პრეზიდენტი გახდეს.

ანქვაბმა უარი თქვა საჯაროდ ესაუბრა თავის გეგმებზე აპირებს თუ არა პრეზიდენტად კენჭისყრას.

"მას თავისი გეგმები აქვს ამ მხრივ და მე ჩემი გეგმები მაქვს. ჩვენ მეგობრები ვართ, მაგრამ ძალების გაერთიანება ნაკლებად სავარაუდოა,“ – განაცხადა შამბამ.

კითხვაზე შესაძლებელია თუ არა 2004 წლის სცენარის გამეორება, როდესაც მაშინდელმა მთავარმა კონკურენტებმა – სერგეი ბაღაფშმა და რაულ ხაჯიმბამ ძალაუფლების გაყოფის შესახებ გარიგებას მიაღწიეს, რის შედეგადაც სადავო არჩევნების შემდეგ ბაღაფში პრეზიდენტი გახდა, ხოლო ხაჯიმბა ვიცე–პრეზიდენტი, შამბამ უპასუხა, რომ აფხაზეთში ყველაფერია შესაძლებელი.

"ჩვენ შეგვიძლია გადამწყვეტ მომენტში ერთმანეთში შეთანხმებას მივაღწიოთ. თუმცა, ამგვარი ვარიანტი ამ მომენტში არ განიხილება,“ – განაცხადა შამბამ.

მან ასევე განაცხადა, რომ ანქვაბთან მას რაიმე "იდეოლოგიური უთანხმოებები“ არ აქვს.

"არის ტაქტიკური ხასიათის სხვადასხვა საკითხები; ამიტომ, თითოეულ ჩვენგანი თავის კურსს მიყვება, თავისი გუნდით,“ – განაცხადა შამბამ.

მან ასევე განაცხადა, რომ თბილისი შესაძლოა აფხაზეთის საპრეზიდენტო არჩევნებზე გავლენის მოხდენას შეეცადოს გალის რაიონის მოსახლეობის მანიპულირებით.

"ისინი ჩვეულებრივ ცდილობენ გალის რაიონის ქართულ მოსახლეობაზე მოახდინონ ზეგავლენა. სავარაუდოდ ამჯერადაც იქნება ეს მცდელობები,“ – განაცხადა მან, "არ ვიცი,  ვის დაუჭერენ ისინი მხარს“.