თბილისის მოთხოვნაზე დათანხმება, რომ სეპარატისტულ რეგიონებში რუსეთთან არსებულ საზღვარზე ტვირთბრუნვის საერთაშორისო მონიტორინგი განხორციელდეს,  "მინიმალური ფასი“ იქნება რუსეთისთვის ვაჭრობის მსოფლიო ორგანიზაციაში (ვმო) გაწევრიანების სანაცვლოდ, განაცხადა პრეზიდენტმა სააკაშვილმა 8 ივლისს რადიოსადგურ "ეხო მოსკვი“–სთან ინტერვიუში.

“ჩვენ არ გვინდა ვმო–ს ხარჯზე მოვაგვაროთ ყველა ჩვენი პრობლემა. მშვენივრად გვესმის, რომ რუსეთის ამჟამინდელი ხელისუფლებისგან არ უნდა ველოდოთ ურთიერთობებში სერიოზულ ცვლილებებს უკეთესობისკენ და ჩვენი ტერიტორიების დეოკუპაციას არ უნდა ველოდოთ მანამ, სანამ როგორც მინიმუმ ეს განწყობები ისევ არსებობს კრემლში“, – განაცხადა მან.

“მაგრამ ჩვენ ვისურვებდით, რომ როგორც მინიმუმ, საერთაშორისო საჯარო ორგანიზაციას, თუნდაც ნებისმიერს... ეკონტროლებინა საქონლის მოძრაობა საქართველოს საზღვრების გავლით, რომელიც აღიარებულია ყველა პასუხისმგებლიანი საერთაშორისო თანამეგობრობის მიერ“, – აღნიშნა სააკაშვილმა.

“ვფიქრობ, რომ ეს რუსეთისთვის მინიმალური ფასია იმის სანაცვლოდ, რასაც ის მიიღებს“ ვმო–ში გაწევრიანებით, დასძინა სააკაშვილმა.

მისი თქმით, არჩევანი შეიძლება შეჩერდეს მსოფლიო საბაჟო ორგანიზაციაზე, ევროკავშირსა ან ნებისმიერ რეგიონულ ორგანიზაციაზე, „სადაც სულ ცოტა რამდენიმე სერიოზული ქვეყანა შედის“, რათა მათ მონიტორინგი განახორციელონ აფხაზეთში ფსოსუსა და ცხინვალის რეგიონში როკის გვირაბის გამშვებ პუნქტებზე.

თუმცა, მისი თქმით, რუსეთი "უარს ამბობს სერიოზული მოლაპარაკება აწარმოოს ჩვენთან“.

მან ასევე განაცხადა, რომ თავიდან რუსეთს იმედი ჰქონდა, რომ თბილისს მისი დასავლელი მოკავშირეები დაითანხმებდნენ რუსეთის ვმო–ში გაწევრიანებაზე, მაგრამ „ეს ძალიან კარგად აუხსნეს რუსეთის ხელისუფლებას სხვა ქვეყნებმა, რომ ამ საკითხის გადაწყვეტა მათზეა დამოკიდებული“.

"ამ თვალსაზრისით, იმედი მაქვს, რომ თანდათან, თუნდაც სუფთა პრაგმატული რუსული პოლიტიკის თვალსაზრისით, ისინი მივლენ აქამდე“, – განაცხადა სააკაშვილმა. 

2011 წლის მარტიდან შვეიცარიის შუამავლობით რუსეთმა და საქართველომ რუსეთის ვმო–ში გაწევრიანებაზე მოლაპარაკებების ორი რაუნდი გამართეს.