7–8 ოქტომბერს ჟენევაში ქართულ–რუსული მოლაპარაკებების მორიგი და წელს „შესაძლოა, მრავალწილად ბოლო რაუნდი“ გაიმართება ვაჭრობის მსოფლიო ორგანიზაციაში (ვმო) რუსეთის გაწევრიანების თაობაზე, განაცხადა საგარეო საქმეთა მინისტრის მოადგილემ დავით ჯალაღანიამ.

თუმცა მინისტრის მოადგილის განცხადებით, თუ შვეიცარიის შუამავლობით მიმდინარე მოლაპარაკებებზე  მხარეებს შორის შეთანხმება ვერ შედგა, ალბათ მომავალ წელს განახლდება დიალოგი, რომელშიც მისი თქმით, თბილისს „ძალიან მკაფიო და პრინციპული“ პოზიცია უკავია. 

„სამწუხაროდ, წინასწარი მონაცემებით, ჩვენ არ ველით რაიმე რადიკალურ ცვლილებებს რუსეთის ხისტი პოზიციის მიმართებით და არ არის მოსალოდნელი, რომ რუსეთმა ჩვენთვის უმნიშვნელოვანეს საკითხებზე  მოქნილობა გამოიჩინოს“, – განაცხადა ჯალაღანიამ 3 ოქტომბერს ბრიფინგზე, „თუმცა იმედით ვართ და მზად ვართ დიალოგისთვის და არცერთ ეტაპზე საქართველოს კითხვის ნიშნის ქვეშ არ დაუყენებია მსჯელობის და დიალოგის მზადყოფნა“.

„თუ ეს [შეთანხმება] ვერ შედგა, ჩვენ იძულებული ვიქნებით, რომ  ვერ შევუწყოთ ხელი მარტივად რომ ვთქვათ,  რუსეთის გაწევრიანების საკითხის გადაჭრას ამ რაუნდზე და უკეთეს შემთხვევაში, ალბათ მოსალოდნელია, რომ დიალოგმა გადაინაცვლოს მომავალ წელს“, – აღნიშნა მან.