ქართველი დიპლომატის განცხადებით, თბილისი კონსტრუქციულად არის განწყობილი შვეიცარიის შუამავლობით ვმო–ში მოსკოვის გაწევრიანებაზე მიმდინარე ქართულ–რუსული მოლაპარაკებების მორიგი რაუნდის მიმართ, რომელიც კვირის ბოლოს იგეგმება.

“ვიმედოვნებთ, რომ გამოვძებნით საერთოს ჩვენს რუს კოლეგებთან“, – განაცხადა სერგი კაპანაძემ, საქართველოს საგარეო საქმეთა მინისტრის მოადგილემ და ვმო–ზე მოლაპარაკებებში ქართული დელეგაციის ერთ–ერთმა ხელმძღვანელმა 4 ოქტომბერს, „მე არ შემიძლია ვთქვა, რომ მეტისმეტი ოპტიმიზმით ვარ ამ საკითხისადმი განწყობილი, გულახდილი რომ ვიყო, მაგრამ ჩვენ კიდევ ერთი რაუნდი გვაქვს წინ და ნაადრევი იქნებოდა ამ რაუნდის წინ საუბარი იმის შესახებ, თუ რა იქნება შედეგი“.

“მე იმედი მაქვს, რომ თუ რუსეთს მართლაც სურს შეუერთდეს ვაჭრობის მსოფლიო ორგანიზაციას, მას შეეძლება დათმობებზე წამოვიდეს რამოდენიმე ყველაზე ფუნდამენტურ საკითხზე, რაზეც ამ დრომდე დათმობები არ გაუკეთებია“, – განაცხადა მან.

იმავდროულად, რუსეთის პირველმა ვიცე–პრემიერმა სერგეი შუვალოვმა განაცხადა, რომ მოსკოვი ახლოს არის ვმო–ში წელს გაწევრიანებასთან, მათ შორის აშშ–ის ძალისხმევის წყალობით.

“ჩვენ ვცდილობთ, რომ ეს შეთანხმება დავასრულოთ დეკემბრის ბოლოსთვის და მე მოხარული ვარ აღვნიშნო, რომ აშშ–ის ხელმძღვანელობის დამსახურებით, ჩვენ ახლოს ვართ მიზანთან“, – იტყობინება „როიტერი“ შუვალოვის სიტყვებზე დაყრდნობით, რომელმაც ეს განცხადება ჩიკაგოში აშშ–რუსეთის ბიზნეს–საბჭოს შეხვედრაზე 4 ოქტომბერს გააკეთა.

მისი თქმით, „რამდენიმე უმნიშვნელო რამ“ დარჩა გადასაწყვეტი და მიანიშნა მესამე მხარეზე, რაც „არ მსურს, რომ საჯაროდ განვიხილო“ გულისხმობდა რა დიდი ალბათობით საქართველოს.