წინა რაუნდების მსგავსად, შვეიცარიის შუამავლობით რუსეთთან ვმო–ზე მიმდინარე მოლაპარაკებების ბოლო რაუნდიც უშედეგოდ დასრულდა, განაცხადა საქართველოს საგარეო საქმეთა მინისტრის პირველმა მოადგილემ ნიკოლოზ ვაშაკიძემ 10 ოქტომბერს.

„რუსეთი უარს აცხადებს იმ ელემენტარულ მინიმუმზეც კი, რაც აუცილებელია, რომ შესრულდეს მისი მხრიდან, რათა საერთაშორისო სავაჭრო ორგანიზაციის ელემენტარული მოთხოვნები დაკმაყოფილდეს მისი მხრიდან საქართველოს მიმართ“, – განაცხადა მან.

ვაშაკიძემ არ უპასუხა კითხვას გაგრძელდება, თუ არა მოლაპარაკებები.  

მოლაპარაკებების შემდეგ ქართული მხარის წარმომადგენელმა, საგარეო საქმეთა მინისტრის მოადგილემ, სერგი კაპანაძემ  AFP-ს განუცხადა შაბათს, რომ მოლაპარაკებების მომდევნო რაუნდის გამართვის საფუძველი არ არსებობს, თუ რუსეთის პოზიცია კვლავ უცვლელი დარჩება.

თუმცა, მან ასევე განაცხადა, რომ თბილისი მზად არის განაგრძოს მოლაპარაკებები, თუ შვეიცარელი შუამავლები ჩათვლიან, რომ მეტი მოლაპარაკებებია საჭირო. თუმცა, მოლაპარაკებებში ჩახედულმა რუსულმა წყარომ განუცხადა „როიტერს“, რომ მოლაპარაკებები 17 ოქტომბერს განახლდება.

თბილისი დაჟინებით მოითხოვს საქონელბრუნვაზე ინფორმაციის წინასწარ გაცვლისა და საერთაშორისო მონიტორინგის მექანიზმის დაწესებას, რათა გამჭირვალე გახდეს ვაჭრობა სეპარატისტული რეგიონების  – აფხაზეთისა და სამხრეთ ოსეთის გასწვრივ რუსეთთან არსებულ საზღვარზე.

რუსეთი აცხადებს, რომ თბილისის მოთხოვნები ვმო–სთან კავშირში არ არის.

„ის, რასაც საქართველო ჩვენგან ითხოვს, ვმო–ს პასუხისმგებლობის სფეროში არ შედის“, – განუცხადა რუსეთის მთავარმა მომლაპარაკებელმა მაქსიმ მედვედკოვმა „როიტერს“.