19 ოქტომბერს საზოგადოებრივმა მაუწყებელმა განაცხადა, რომ ის მზად არის პირდაპირ ეთერში გადასცეს ბიძინა ივანიშვილის პრესკონფერენცია.

”საქართველოს საზოგადოებრივი მაუწყებლის არაერთი შეთავაზების მიუხედავად, ბიძინა ივანიშვილი ისევ უარს აცხადებს მონაწილეობა მიიღოს არხის პოლიტიკურ თოქშოუში და დღემდე ჟურნალისტებთან ურთიერთობს შერჩევითობის პრინციპით,”  – ნათქვამია მაუწყებლის მიერ გავრცელებულ განცხადებაში, ”მიუხედავად ამისა, საზოგადოებრივი მაუწყებელი მზადაა უზრუნველყოს ბიძინა ივანიშვილის პრესკონფერენციის პირდაპირი ეთერი, იმ შემთხვევაში, თუ ეს პრესკონფერენცია საერთოდ დაინიშნება და მასზე შეკითხვის დასმის საშუალება ექნება მედიის ყველა წარმომადგენელს და ივანიშვილი ამჯერად მაინც არ იმოქმედებს შერჩევითობის პრინციპით.”

”აქვე დავძენთ, რომ მაუწყებელი ძალაში ტოვებს პირველ შეთავაზებასაც და კვლავ იწვევს ერთ-ერთ პოლიტიკურ თოქშოუში ბატონ ივანიშვილს,” – აცხადებს საზოგადოებრივი მაუწყებელი.

ივანიშვილის პრესსამსახურმა 13 ოქტომბერს განაცხადა, რომ მილიარდერი მეცენანტი, რომელსაც ოპოზიციური პარტიის შექმნა სურს, მზად არის მისი პრესსამდივნოს ოფისიდან ქართული მედიისთვის პრესკონფერენცია გამართოს, თუ მთელი ქვეყნის მასშტაბით მაუწყებელი რომელიმე ტელევიზია - საზოგადოებრივი მაუწყებელი, რუსთავი 2 ან იმედი - ამ პრესკონფერენციას პირდაპირ ეთერში გადასცემს.