Civil.ge-ს შესახებ
Eng | ქარ | Рус
ბოლო განახლება: 11:10 - 28 აპრ.'18
RSS
Mobile
Twitter
Facebook
ივანიშვილი დაგეგმილი პოლიტიკური პარტიის შესახებ საუბრობს
სივილ ჯორჯია, თბილისი / 7 ნოე.'11 / 17:50

  • „არ დავიმალები, თუ ხმების დაცვა გახდება საჭირო“;
  • ბურჯანაძესთან თანამშრომლობა შესაძლებელია.

ბიძინა ივანიშვილი თავის პირველ პრესკონფერენციაზე 1 ნოემბერს. ფოტო: გურამ მურადოვი/Civil.ge

მილიარდერმა ქველმოქმედმა ბიძინა ივანიშვილმა განაცხადა, რომ მისი პოლიტიკური პარტიის ნომინალური ლიდერი შესაძლოა მისი 19 წლის ვაჟი გახდეს, რაც დაეხმარება მას თავიდან აიცილოს ყველა სამართლებრივი დაბრკოლება, ვინაიდან საქართველოს მოქალაქეობის დაკარგვის შემდეგ მას პოლიტიკური პარტიის შექმნის ან დაფინანსების უფლება აღარ აქვს.

როგორც პირველი ნაბიჯი თავისი პოლიტიკური საქმიანობის ოფიცილურად დაწყებისა, ივანიშვილი 25 ნოემბერს საზოგადოებრივი მოძრაობის „ქართული ოცნება“ დაფუძნებას გეგმავს. ივანიშვილს, რომელსაც ამჟამად საფრანგეთის და რუსეთის პასპორტები აქვს (რუსეთის მოქალაქეობაზე უარის თქმის პროცედურები მან უკვე დაიწყო), უფლება აქვს არასამეწარმეო (არაკომერციული) იურიდიული პირი დააფუძნოს საზოგადოებრივი მოძრაობის სახით.     

„ჩვენ უკვე გამოვაცხადეთ, რომ 25 ნოემბერს ვაყალიბებთ საზოგადოებრივ მოძრაობას, თუნდაც, როგორც საფრანგეთის მოქალაქეს, მე ამისი სრული უფლება მაქვს. რამდენიმე დღის დაგვიანებით და იმავე რეჟიმში კი ჩამოვაყალიბებთ პოლიტიკურ პარტიასაც, ოღონდ უკვე უჩემოდ და იქ ერთ–ერთი ჩემი ახლო ნათესავი ან სულაც ჩემი ვაჟი, უტა გამოჩნდება ჯგუფთან ერთად და შესაბამისად გახმიანდება ივანიშვილის გვარიც“, – განაცხადა ივანიშვილმა გაზეთ „კვირის პალიტრა“–სთვის მიცემულ საკმაოდ გრძელ ინტერვიუში, რომელიც 7 ნოემბერს გამოქვეყნდა.

მან ნათლად აღნიშნა, რომ მისი ვაჟის შესაძლო ჩართვა მხოლოდ პირობითი იქნება და ამის მიზანი მხოლოდ პარტიის დაფინანსების საკითხების მოგვარება და იმის ჩვენება იქნება, რომ ეს ივანიშვილის პარტიაა.

„უტა შეიძლება იყოს პოლიტიკაში, რათა მოხერხდეს დაფინანსების საკითხის გადაწყვეტა და გვარი – ივანიშვილი ჟღერდეს“, – განაცადა მან და დასძინა რომ მას და მის მეუღლეს არ უნდათ რომ მათი ვაჟი სწავლას მოწყდეს.

იმავე ინტერვიუში, ივანიშვილმა კიდევ ერთხელ გაიმეორა, რომ იგი ქუჩის საპროტესტო აქციების წინააღმდეგია, თუმცა ასევე აღნიშნა, რომ იგი „არ დაიმალება“, თუ „ხმების დაცვა“ გახდება საჭირო.

მან ასევე აღნიშნა, რომ დარწმუნებულია, რომ ასეთი სცენარი საჭირო არ იქნება, რადგანაც იმდენად დიდი იქნება სხვაობა მიღებულ ხმებს შორის, რომ ხელისუფლებისთვის შეუძლებელი იქნება არჩევნების გაყალბების გზით შედეგების შეცვლა.

„თუ ჩვენ, საქართველოს მოსახლეობა, საერთაშორისო თანამეგობრობასთან ერთად ვერ მოვახერხებთ და ვერ ვაიძულებთ სააკაშვილს, რომ დაუბრუნდეს კანონიერების ფარგლებს და არ დამიბრუნებს საქართველოს მოქალაქეობას, მგონი, ეს ვითარებას დიდად არ შეცვლის. მთავარია, რომ მოხდება სწორი ორიენტაცია, საქართველოს მოსახლეობის ხმები სწორად გადანაწილდება. შედეგი კი იქნება იგივე – სააკაშვილი ვერ მიიღებს ბევრ ხმას და ამის ილუზია ტყუილად აქვთ... 5 პროცენტს 55%–ად ვერ გადააქცევ; ამას ვერ გააკეთებს არც საქართველოს მოსახლეობა და არც საერთაშორისო თანამეგობრობა ამას მხარს არ დაუჭერს“, – განაცხადა ივანიშვილმა.

„ამიტომაც მე ქუჩაში გამოსვლები პრინციპულად არ მინდა. მაგრამ განსაზღვრულ ვითარებაში ხმებს აუცილებლად დავიცავ. თუ იმას გულისხმობთ, რომ სადღაც დავიმალები ტოტალური გაყალბების შემთხვევაში, ასე არ მოხდება – ხმებს აუცილებლად დავიცავთ. მაგრამ დარწმუნებული ვარ, იმდენად დიდი იქნება სხვაობა მიღებულ ხმათა შორის და ისეთი უსუსური გამოჩნდება არჩევნების შემდეგ ნაციონალური მოძრაობა, რომ ამის საჭიროება არ იქნება“, – განაცხადა მან.

კითხვაზე, იყო თუ არა მისი მთავარი გათვლა არჩევნებში მოსახლეობის მასობრივად მაღალი აქტივობა და ხმების მაქსიმალური ოდენობა, რის შედეგადაც გაყალბება შეუძლებელი გახდებოდა, მან უპასუხა: „რა თქმა უნდა“.

„ნახეთ გენიალური მაგალითი: არავის მოუწოდებია და არავის დაუძახია დასახმარებლად. ხალხმა ნახა უსამართლობის ერთი მაგალითი და ორი–სამი დღის წინ ბანკ „ქართუში“ მხარდაჭერის მიზნით ანგარიშების გახსნა დაიწყო. მე ამ მხარდაჭერას კარგად ვგრძნობ“, – განაცხადა ივანიშვილმა.
 
მან კიდევ ერთხელ გაიმეორა, რომ მის პოლიტიკურ პარტიას პარტნიორობა ექნება ორ ოპოზიციურ პარტიასთან – რესპუბლიკელებთან და ჩვენი საქართველო–თავისუფალ დემოკრატებთან. მან ასევე განაცხადა, რომ შესაძლოა ამ ორ პარტიასთან რაღაც ტიპის კავშირი შედგეს, თუმცა მათთან გაერთიანებას ადგილი არ ექნება.     

მან ასევე განაცხადა, რომ იგი სხვა ოპოზიციურ პარტიებთანაც ითანამშრომლებს. ივანიშვილის თქმით, მის მიერ ქართული პოლიტიკური ლანდშაფტის თავდაპირველი შეფასება სწორი იყო, როდესაც მან პარტიები „რეალურ, ჯანსაღ ოპოზიციად“ და „ფსევდო–ოპოზიციად“ დაყო.   

„ის პროცესები, რაც ფსევდოოპოზიციურ პარტიებში ხდება, კიდევ გაღრმავდება. ჩანს სწორად გავაანალიზე ქართული პოლიტიკური სპექტრი“, – განაცხადა მან.

ივანიშვილს მხედველობაში ჰქონდა ახალი მემარჯვენეებში, ლეიბორისტულ პარტიაში და ქართულ პარტიაში ბოლო დროს განვითარებული მოვლენები. დავით საგანელიძემ ახალი მემარჯვენეებიდან გენერალური მდივნის პოსტი დატოვა და ამის მოტივად პარტიის დანარჩენ ხელმძღვანელობასთან პოლიტიკის საკითხებზე უთანხმოება დაასახელა. თუმცა, მისი თქმით, იგი პარტიის წევრად რჩება. ცოტა ხნის წინ ლეიბორისტული პარტიის რიგები დატოვა ნესტან კირთაძემ და მან ამის მიზეზად, ბიძინა ივანიშვილის მიმართ პარტიაში არსებული უარყოფითი პოზიცია დაასახელა. ასევე ვრცელდება ინფორმაცია იმის თაობაზე, რომ სოზარ სუბარმა დატოვა და აპირებს დატოვოს ქართული პარტიის თავმჯდომარის პოსტი; სუბარს ეს ინფორმაცია ჯერ არ დაუდასტურებია. 

ივანიშვილმა ასევე განაცხადა, რომ შესაძლებელია ნინო ბურჯანაძესთან თანამშრომლობაც.

„ყველაზე დიდი წინააღდეგობა, რაც ჩვენ შორის არსებობს არის ის, რომ ქალბატონი ნინო ქუჩის გამოსვლების უპირატესობას აღიარებს, მე კი ამას გამოვრიცხავ. კიდევ არის რაღაც შეკითხვები ქალბატონ ნინოსთან, მაგრამ, ვფიქრობ, ჩვენ ამ შეკითხვებს მოვხსნით, პოზიციებს შევათანხმებთ და აუცილებლად ვითანამშრომლებთ ქალბატონ ნინოსთან. მას კარგი საპარლამენტო და მთავრობაში მუშაობის გამოცდილება აქვს“, – განაცხადა ივანიშვილმა.

 

ამავე თემაზე
უახლესი ამბები
28 აპრ.'18 11:10
ვანის და ხონის საარჩევნო ოლქში შუალედური საპარლამენტო არჩევნები მიმდინარეობს
ერთმანდატიან საარჩევნო ოლქში არჩევნებში ხუთი პარტიის და ერთი საინიციატივო ჯგუფის წარმომადგენელები მონაწილეობენ.
27 აპრ.'18 18:49
ქართველი პოლიტიკოსები ბიძინა ივანიშვილის პარტიაში დაბრუნებას აფასებენ
ბიძინა ივანიშვილს ქართული ოცნების თავმჯდომარედ პარტიის ყრილობაზე აირჩევენ, რომელიც უახლოეს პერიოდში შედგება.
27 აპრ.'18 18:09
აშშ-ის სახელმწიფო მდივნის თანაშემწე საქართველოს ესტუმრება
ვეს მიტჩელი ხელისუფლების წარმომადგენლებს შეხვდება და ნატო-საქართველოს სახალხო დიპლომატიის ფორუმზე გამოვა სიტყვით.
26 აპრ.'18 19:07
სტოლტენბერგი: საქართველო ნატოს ‘ძალიან ახლო’ პარტნიორია
ნატოს გენერალური მდივნის თქმით, საგარეო საქმეთა მინისტრების შეხვედრა ქვეყნის პროგრესს აღიარებს.
26 აპრ.'18 16:47
ყოფილი პრემიერ-მინისტრი ბიძინა ივანიშვილი ქართული ოცნების თავმჯდომარე გახდება
პრემიერ კვირიკაშვილის თქმით, ივანიშვილს შესწევს ძალა გააძლიეროს პოლიტიკური პარტია და მას „ახალი დინამიკა“ შესძინოს.
25 აპრ.'18 18:33
ხაჯიმბამ მთავრობის ახალი ხელმძღვანელი დანიშნა
გენადი გაგულიას ორჯერ ეკავა ოკუპირებული რეგიონის პრემიერ-მინისტრის თანამდებობა.
25 აპრ.'18 15:17
საქართველოს რეიტინგი პრესის თავისუფლების ინდექსში გაუმჯობესდა
საქართველოს პოსტ-საბჭოთა ქვეყნებიდან, ბალტიისპირეთის ქვეყნების გარდა, არცერთი ქვეყანა არ უსწრებს.
25 აპრ.'18 14:18
გახარია ლიტვაში საგარეო და შინაგან საქმეთა მინისტრებს შეხვდა
საქართველოს და ლიტვის ოფიციალურმა პირებმა ევროკავშირთან უვიზო რეჟიმზე და სამართალდამცავ სტრუქტურებს შორის თანამშრომლობაზე ისაუბრეს.
24 აპრ.'18 17:29
განსხვავებული რეაქციები საქართველოში სომხეთის პროტესტზე
მმართველი პარტიის დეპუტატმა განაცხადა გუშინ, რომ „მთავარია მშვიდი ვითარება და სტაბილურობა ჩვენს სამეზობლოში“.
24 აპრ.'18 12:42
ცხინვალის ლიდერი იალტის ფორუმს დაესწრო და სირიის, იტალიის და სერბეთის დელეგაციებს შეხვდა
ანატოლი ბიბილოვმა 19-21 აპრილს იალტის საერთაშორისო ეკონომიკურ ფორუმში მიიღო მონაწილეობა.

სივილ ჯორჯიას შესახებ
Civil.Ge © 2001-2019, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
21