საქართველომ რუსეთთან მიმართებაში ევროპაში ჩვეულებრივი შეიარაღებული ძალების შესახებ (CFE) ხელშეკრულების შეჩერების შესახებ გამოაცხადა, თუმცა აღნიშნა, რომ გააგრძელებს ნაკისრი ვალდებულებების შესრულებას ხელშეკრულების ყველა სხვა წევრ-სახელმწიფოებთან მიმართებაში.

საგარეო საქმეთა სამინისტრომ 29 ნოემბერს განაცხადა, რომ თბილისის ეს გადაწყვეტილება ნიშნავს, რომ არ მიაწვდის რუსეთს ინფორმაციას ყოველწლიური საინფორმაციო გაცვლის ფარგლებში, რომელიც ხორციელდება CFE–ის ხელშეკრულების შესაბამისად; არ მიაწვდის რუსეთის ფედერაციას რაიმე შეტყობინებას ხელშეკრულების თანახმად; და არ მიიღებს რუსეთის ფედერაციის მიერ CFE–ის ხელშეკრულების თანახმად მოთხოვნილ ინსპექციებს.

საგარეო უწყების ცნობით, ქართულმა მხარემ მისი გადაწყვეტილების შესახებ ხელშეკრულების ფარგლებში მოქმედ ერთობლივი საკონსულტაციო ჯგუფს აცნობა.

რუსეთმა CFE–ის ხელშეკრულებასა და მისგან გამომდინარე შეთანხმებების მოქმედება  2007 წლის ივლისში, საქართველოსთან 2008 წლის აგვისტოს ომამდე ერთი წლით ადრე ცალმხრივად შეაჩერა იმ დრომდე, ვიდრე CFE-ის ხელმომწერი სახელმწიფოები არ მოახდენენ მის რატიფიცირებას.

“2008 წლის აგვისტოში საქართველოს წინააღმდეგ განხორციელებული ფართომასშტაბიანი სამხედრო აგრესიით, რომელიც დასრულდა საქართველოს ტერიტორიების - აფხაზეთისა და ცხინვალის რეგიონის ოკუპაციით, რუსეთის ფედერაციამ უხეშად დაარღვია როგორც საერთაშორისო სამართლის ფუნდამენტური ნორმები, ისე CFE-ის ხელშეკრულების ერთ-ერთი მთავარი პრინციპი, რომელიც გაწერილია მის პრეამბულაში და ავალდებულებს მონაწილე სახელმწიფოებს ''თავი შეიკავონ როგორც ერთმანეთთან, ასევე საერთაშორისო ურთიერთობებში ძალის გამოყენებისგან ან ძალით მუქარისგან, როგორც რომელიმე სახელმწიფოს ტერიტორიული მთლიანობის ან პოლიტიკური დამოუკიდებლობის წინააღმდეგ, ასევე რამე სხვა სახით, რომელიც შეუთავსებელია გაერთიანებული ერების ორგანიზაციის წესდების მიზნებთან და პრინციპებთან", – ნათქვამია საქართველოს საგარეო უწყების განცხადებაში.

„ამჟამად, რუსეთს ოკუპირებული აქვს საქართველოს ტერიტორიის 20%, სადაც CFE-ის  ხელშეკრულებისა და ევროკავშირის შუამავლობით მიღწეული ცეცხლის შეწყვეტის შესახებ შეთანხმების უხეში დარღვევით აგრძელებს უკანონო სამხედრო აღმშენებლობას“, თუმცა მიუხედავად ამისა, საქართველოს საგარეო საქმეთა სამინისტრო ხაზს უსვამს, რომ ამ დრომდე „საქართველო განუხრელად ასრულებდა ხელშეკრულებით და საფლანგო დოკუმენტით განსაზღვრულ ყველა ვალდებულებას რუსეთის ფედერაციის მიმართ“.