ნაციონალური მოძრაობა თანახმაა, რომ საარჩევნოდ პარტიათა ქცევის წესების შესახებ მის მიერ გასულ კვირას ინიცირებულ ოთხპუნქტიან დეკლარაციას მეხუთე პუნქტად დაემატოს კამპანია „ეს შენ გეხებას“ მიერ შემუშავებული „ღირებული“ შეთავაზებები, განაცხადა პარლამენტის თავმჯდომარემ დავით ბაქრაძემ.  

„ვფიქრობ, ყველა პარტია, რომელიც დაინტერესებულია იმაში, რომ საარჩევნო პროცესი იყოს დაცული ძალადობისგან, იყოს დაცული ამომრჩევლის მოსყიდვისგან, იყოს დაცული ადმინისტრცაიული რესურსის გამოყენებისგან; პარტია, რომელიც დაინტერესებულია იმით, რომ საქართველოში მართლაც ჩატარდეს დემოკრატიული არჩევნები და არა არჩევნების საბაბით რაიმე სხვა ტიპის პროცესები, ვფიქრობ ყველა ასეთი პარტიისთვის მისაღები უნდა იყოს ის პრინციპები, რომლითაც ჩვენ გამოვდივართ“, – განაცხადა მან 19 ივლისს ბრიფინგზე. 

"მივმართავთ ყველა პოლიტიკურ პარტიას დამატებით იმისა, რაც იყო შემოთავაზებული წინა კვირაში, დავთანხმდეთ და მივიღოთ ყველა ის პრინციპი, რომელიც შემუშავებული იქნა არასამთავრობო ორგანიზაციების მხრიდან", – აღნიშნა პარლამენტის სპიკერმა. 

მისი თქმით, მმართველი პარტია ამ „მაღალი სტანდარტის“ დოკუმენტზე დაელოდება იმ პარტიების გამოხმაურებას, რომლის „ინტერესშიც ნამდვილად შედის დემოკრატიული არჩევნების ჩატარება და არა არჩევნების საბაბით რაიმე სხვა პროცესების პროვოცირება“.

თავდაპირველად ნაციონალურმა მოძრაობამ ოთხპუნქტიანი დეკლარაცია, რომლის ბოლო პუნქტიც „ცესკოს მიერ შეჯამებული და სანდო რეპუტაციის მქონე სადამკვირვებლო ორგანიზაციების მიერ ლეგიტიმურად მიჩნეული არჩევნების შედეგების აღიარებას“ ეხება, 14 ივლისს შესთავაზა პარტიებს ხელმოსაწერად.

რამდენიმე პოლიტიკურმა პარტიამ, მათ შორის ქრისტიან–დემოკრატიულმა მოძრაობამ და ახალმა მემარჯვენეებმა, განაცხადეს, რომ ისინი შეუერთდებიან დეკლარაციას.

ბიძინა ივანიშვილის ოპოზიციური კოალიცია „ქართულმა ოცნება“ თავად იდეას მიესალმა, თუმცა აღნიშნა, რომ ასეთი დოკუმენტი პარტიებისა და არასამთავრობო ორგანიზაციების ჩართულობით უნდა შეიქმნას. კოალიციამ მმართველი პარტია პროცესის მითვისების მცდელობაში დაადანაშაულა, რადგან, მისი ინფორმაციით, ამ საკითხებზე არასამთავრობო სექტორში მანამდე იყო დაწყებული მუშაობა.

16 ივლისს კამპანია „ეს შენ გეხებას“ წარმომადგენელმა ორგანიზაციებმა განაცხადეს, რომ შეთანხმების პრინციპები არ უნდა იყოს ნაკარნახევი მხოლოდ ერთი პოლიტიკური ძალის მხრიდან და მმართველი პარტიის შეთავაზებულ პრინციპებს არასაკმარისი უწოდეს. მათ წარმოადგინეს საკუთარი 17–პუნქტიანი ინიციატივა და პარტიებს დიალოგის გზით ქცევის წესებზე შეთანხმებისკენ მოუწოდეს.

„ეს შენ გეხებას“ წარმომადგენლებმა გარკვეული მედიატორის როლიც იკისრეს ამ პროცესში და 18 ივლისს ცალკ–ცალკე საკონსულტაციო შეხვედრები გამართეს „ქართული ოცნების“ და მმართველი პარტიის წარმომადგენლებთან.