5 ნოემბერს პარლამენტის ბიურომ რეგისტრაციაში გაატარა ახალი საპარლამენტო ფრაქცია სახელწოდებით „უპარტიო, დამოუკიდებელი მაჟორიტარები“, რომელიც არც უმცირესობაში და არც უმრავლესობაში არ არის გაერთიანებული.

პარლამენტში რიგით მეშვიდე ახალი ფრაქციის თავმჯდომარე არის გოგი ლიპარტელიანი, ლენტეხის მაჟორიტარი დეპუტატი.

მისი ჩათვლით ფრაქციაში სულ ექვსი წევრია გაერთიანებული, რომლებიც იმის მიუხედავად, რომ პარლამენტში ერთიანი ნაციონალური მოძრაობის მხარდაჭერით მოხვდნენ, საპარლამენტო უმცირესობის გარეთ არჩიეს ყოფნა.

ფრაქციის წევრები არიან: გოდერძი ბუკია, ხობის მაჟორიტარი დეპუტატი; კახა ოქრიაშვილი, დმანისის მაჟორიტარი დეპუტატი და ფარმაცევტული ქსელის პსპ–ს თანადამფუძნებელი; ენზელ მკოიანი, ნინოწმინდას მაჟორიტარი დეპუტატი; სერგო ხაბულიანი, ცაგერის მაჟორიტარი დეპუტატი; და გიორგი გოზალიშვილი ლაგოდეხის მაჟორიტარი დეპუტატი, რომელიც თანაფრაქციელებისაგან განსხვავებით თავდაპირველად საპარლამენტო უმცირესობაში გაწევრიანდა, თუმცა ერთი კვირის თავზე დატოვა ეს გაერთიანება.

ნაციონალურმა მოძრაობამ პარლამენტში 65 დეპუტატი გაიყვანა, თუმცა უმცირესობაში ამჟამად 59 პარლამენტის წევრი რჩება.

საქართველოს წარსული საპარლამენტო გამოცდილება აჩვენებს, რომ მაჟორიტარი დეპუტატები, განსაკუთრებით კი ისინი, რომლებიც აქტიურად არ არიან ჩართული პოლიტიკურ ცხოვრებაში, როგორც წესი, მმართველ პარტიასთან თანამშრომლობისკენ იხრებიან.