საქსტატის მიერ ორშაბათს გამოქვეყნებული მონაცემების თანახმად, წლიური ინფლაციის დონე უკვე მეექვსე თვეა, რაც ნულის ფარგლებში მერყეობს.

ნოემბერში წლიური ინფლაციის დონემ საქართველოში -0,5  პროცენტი შეადგინა, რასაც წინ უძღოდა 0.1%–იანი ზრდა ოქტომბერში და 0.1%–იანი დეფლაცია სექტემბერში. 

საქართველოს ეროვნულმა ბანკმა ნოემბერში საპროცენტო განაკვეთი 25 საბაზისო პუნქტით, 5.5%–მდე შეამცირა, რაც ყველაზე დაბალი მაჩვენებელია ბოლო ორნახევარი წლის მანძილზე.

ნოემბერში სურსათის ფასები 1.8%–ით შემცირდა წინა წლის ნოემბერთან შედარებით; ასევე 2.5%–იანი კლება დაფიქსირდა ტანსაცმლის და ფეხსაცმლის ფასებზე; ხოლო სასტუმროების და რესტორნების სექტორში და ჯანდაცვის მომსახურებაში ფასები 5%–ით და 2.5%–ით გაიზარდა, შესაბამისად, გასული წლის ანალოგიურ პერიოდთან შედარებით.

ნოემბერში, წინა წლის ანალოგიურ პერიოდთან შედარებით, 16%–იანი ზრდა დაფიქსირდა ამბულატორიულ სამედიცინო მომსახურებაზე. საქსტატის ინფორმაციით, ტრანსპორტის ფასები 0.5%–ით გაიზარდა.

2011 წლის მაისში 14.3%–მდე გაზრდის შემდეგ, წლიურმა ინფლაციამ კლება დაიწყო და 2011 წლის ბოლოსთვის 2%–მდე შემცირდა, ხოლო 2012 წლის დასაწყისისთვის ნულს ქვემოთ ჩამოვიდა და მაისში –3.3% შეადგინა.