Civil.ge-ს შესახებ
Eng | ქარ | Рус
ბოლო განახლება: 11:10 - 28 აპრ.'18
RSS
Mobile
Twitter
Facebook
პატრიარქი სექსუალური უმცირესობების მხარდამჭერი აქციის გაუქმებისკენ მოუწოდებს
სივილ ჯორჯია, თბილისი / 16 მაი.'13 / 16:27

საქართველოს კათოლიკოს-პატრიარქი ილია მეორე 17 მაისს თბილისის ცენტრში ჰომოფობიის წინააღმდეგ დაგეგმილ აქციის წინააღმდეგ გამოდის და თბილისის მერიას, ხელისუფლებას დემონტრაციაზე „ჰომოსექსუალებისათვის მიცემული ნებართვის“ გაუქმებისკენ მოუწოდებს.

„საერთაშორისო კონვენციები ცალსახად იძლევიან იმის უფლებას, რომ, “საზოგადოებრივი ინტერესების გათვალისწინებით, უწესრიგობისა და დანაშაულის თავიდან აცილების, სხვათა უფლებებისა და ღირსების დაცვის მიზნით” შეიძლება შეიზღუდოს გამოხატვის თავისუფლება“, - აღნიშნავს პატრიარქი დაგეგმილ აქციამდე ერთი დღით ადრე გავრცელებულ წერილობით განცხადებაში.

ჰომოფობის წინააღმდეგ ბრძოლის საერთაშორისო დღის აღსანიშნავად აქცია 17 მაისს თბილისის ცენტრში პარლამენტის ყოფილი შენობის წინ არის დაგეგმილი, რომლის ერთ-ერთი ორგანიზატორის, ლგბტ უფლებადამცველი ორგანიზაციის „იდენტობა“ ინფორმაციით, ეს შეკრება დაახლოებით ნახევარ საათს გაგრძელდება.

აქციის მოწინააღმდეგეები, მათ შორის მართლმადიდებლური ჯგუფები, ასევე გეგმავენ 17 მაისს პარალელური შეკრების გამართვას.

„როგორც საზოგადოებისათვის ცნობილია, ა.წ. 17 მაისს რუსთაველის გამზირზე დაგეგმილია სექსუალური უმცირესობების და მათი მხარდამჭერების შეკრება, რომელიც მიზნად ისახავს არა ამ ადამიანების რეალური პრობლემების მოგვარებას, არამედ თემით სპეკულირებას, რადგან ფაქტია, ჩვენს ქვეყანაში დამკვიდრებული ტრადიციული აზროვნების მიუხედავად, მათ შეუზღუდავად შეუძლიათ წარმართონ თავისი პირადი ცხოვრება“, - ნათქვამია პატრიარქის განცხადებაში.

ილია მეორე ასევე აცხადებს, რომ ეკლესია „ჰომოსექსუალიზმს ანომალიად და დაავადებად მიიჩნევს“, ხოლო ასეთი მიდრეკილებების მქონე ადამიანებს „მეტად მძიმე ცოდვაში მყოფ პიროვნებებად“ განიხილავს, რომლებსაც „დახმარება და გამოსწორებისათვის სულიერი თანადგომა სჭირდებათ და არა წახალისება და, მითუმეტეს, მათი მდგომარეობის მოსახლეობისათვის თავსმოხვევა“.

„ეს იგივეა, რომ მოგწონდეს ნარკომანის ქმედება და თანაც ნარკომანიის საყოველთაო აფიშირებას ახდენდე“, - აცხადებს პატრიარქი. 

ილია მეორე თავის განცხადებაში ასევე აღნიშნავს, რომ „მძაფრი პროტესტი“ მსგავსი შეკრებების მიმართ „გასაგებია“.  

„ჩვენი მოქალაქეები ამაში ხედავენ  უმრავლესობის უფლებების დარღვევას, მათი  ტრადიციების,  სარწმუნოებისა და, ზოგადად, აზროვნების წესის შეურაცხყოფას“, - აცხადებს პატრიარქი.

„ვფიქრობთ, თბილისის მერიამ და ხელისუფლებამ უნდა გაითვალისწინოს ეს და გააუქმოს ჰომოსექსუალებისათვის მიცემული ნებართვა დემონსტრაციისა; მითუმეტეს, რომ დღეს მთელს ქვეყანაში საყოველთაო გლოვაა გამოცხადებული მოყვასისათვის  თავგანწირული ვაჟკაცების გარდაცვალებასთან დაკავშირებით“, - ნათქვამია განცხადებაში. 

საქართველოს კანონმდებლობა აქციის გამართვაზე ნებართვის გაცემას არ ითვალისწინებს, თუმცა ავალდებულებს აქციის ორგანიზატორებს, რომ დაგეგმილი შეკრების შესახებ წინასწარ აცნობონ თვითმმართველობის ორგანოებს.

თბილისის მერიამ 16 მაისს გავრცელებულ განცხადებაში აღნიშნა, რომ ჰომოფობიის წინააღმდეგ დაგეგმილი აქციის შესახებ მას 2 მაისს აცნობეს, ხოლო ამ აქციის საწინააღმდეგო პარალელური შეკრების გეგმებზე 13 მაისს გააფრთხილეს.

„შესაბამისად აღნიშნულ გაფრთხილებები თბილისის მერიის მიერ მიღებული იქნა მხოლოდ ცნობად და განმცხადებლებს განემარტათ, "შეკრებებისა და მანიფესტაციებისშესახებ" საქართველოს კანონის განსაზღვრული უფლებამოვალეობანი. თბილისის მერიის მიერ ორივე აქციის თაობაზე ასევე გაფრთხილებული იქნა საქართველოს შსს საპატრულო პოლიციის დეპარტამენტი“, - ნათქვამია მერიის განცხადებაში.

როცა 14 მაისს გამართულ პრესკონფერენციაზე პრემიერ-მინისტრს ბიძინა ივანიშვილს 17 მაისს თბილისის ცენტრში ლგბტ უფლებებების დამცველი აქციის შესახებ კითხეს, მან უპასუხა, რომ სექსუალური უმცირესობებს ისეთივე უფლებები აქვთ, როგორიც სხვა მოქალაქეებს და საზოგადოება „ნელ-ნელა ამას შეეჩვევა“.

კითხვაზე თუ როგორ იმოქმედებს ხელისუფლება იმ ვითარებაში, როცა ისმის მუქარები ლგბტ უფლებების დამცველთა მიმართ, ივანიშვილმა უპასუხა: „დავაშორებთ [დაგეგმილ ორ პარალელურ აქციას] ალბათ, მე კონკრეტულად ვერ გეტყვით როგორ მოხდება ეს პროცესი, მაგრამ არსებობს პოლიცია, ჩადგება შუაში და მათაც მისცემს საშუალებას და არ მისცემენ ხელის შეშლის უფლებებს და დაიცავენ ყველა ადამიანის უფლებებს“.

შარშან, როდესაც ლგბტ აქტივისტები ამ დღის აღსანიშნავად თბილისის ცენტრში პირველ ასეთ მანიფესტაციას მართავდნენ, მართლმადიდებლურმა ჯგუფებმა მათი მსვლელობა ჩაშალეს, რასაც სიტყვიერი და ფიზიკური დაპირისპირება მოყვა.

უახლესი ამბები
28 აპრ.'18 11:10
ვანის და ხონის საარჩევნო ოლქში შუალედური საპარლამენტო არჩევნები მიმდინარეობს
ერთმანდატიან საარჩევნო ოლქში არჩევნებში ხუთი პარტიის და ერთი საინიციატივო ჯგუფის წარმომადგენელები მონაწილეობენ.
27 აპრ.'18 18:49
ქართველი პოლიტიკოსები ბიძინა ივანიშვილის პარტიაში დაბრუნებას აფასებენ
ბიძინა ივანიშვილს ქართული ოცნების თავმჯდომარედ პარტიის ყრილობაზე აირჩევენ, რომელიც უახლოეს პერიოდში შედგება.
27 აპრ.'18 18:09
აშშ-ის სახელმწიფო მდივნის თანაშემწე საქართველოს ესტუმრება
ვეს მიტჩელი ხელისუფლების წარმომადგენლებს შეხვდება და ნატო-საქართველოს სახალხო დიპლომატიის ფორუმზე გამოვა სიტყვით.
26 აპრ.'18 19:07
სტოლტენბერგი: საქართველო ნატოს ‘ძალიან ახლო’ პარტნიორია
ნატოს გენერალური მდივნის თქმით, საგარეო საქმეთა მინისტრების შეხვედრა ქვეყნის პროგრესს აღიარებს.
26 აპრ.'18 16:47
ყოფილი პრემიერ-მინისტრი ბიძინა ივანიშვილი ქართული ოცნების თავმჯდომარე გახდება
პრემიერ კვირიკაშვილის თქმით, ივანიშვილს შესწევს ძალა გააძლიეროს პოლიტიკური პარტია და მას „ახალი დინამიკა“ შესძინოს.
25 აპრ.'18 18:33
ხაჯიმბამ მთავრობის ახალი ხელმძღვანელი დანიშნა
გენადი გაგულიას ორჯერ ეკავა ოკუპირებული რეგიონის პრემიერ-მინისტრის თანამდებობა.
25 აპრ.'18 15:17
საქართველოს რეიტინგი პრესის თავისუფლების ინდექსში გაუმჯობესდა
საქართველოს პოსტ-საბჭოთა ქვეყნებიდან, ბალტიისპირეთის ქვეყნების გარდა, არცერთი ქვეყანა არ უსწრებს.
25 აპრ.'18 14:18
გახარია ლიტვაში საგარეო და შინაგან საქმეთა მინისტრებს შეხვდა
საქართველოს და ლიტვის ოფიციალურმა პირებმა ევროკავშირთან უვიზო რეჟიმზე და სამართალდამცავ სტრუქტურებს შორის თანამშრომლობაზე ისაუბრეს.
24 აპრ.'18 17:29
განსხვავებული რეაქციები საქართველოში სომხეთის პროტესტზე
მმართველი პარტიის დეპუტატმა განაცხადა გუშინ, რომ „მთავარია მშვიდი ვითარება და სტაბილურობა ჩვენს სამეზობლოში“.
24 აპრ.'18 12:42
ცხინვალის ლიდერი იალტის ფორუმს დაესწრო და სირიის, იტალიის და სერბეთის დელეგაციებს შეხვდა
ანატოლი ბიბილოვმა 19-21 აპრილს იალტის საერთაშორისო ეკონომიკურ ფორუმში მიიღო მონაწილეობა.

სივილ ჯორჯიას შესახებ
Civil.Ge © 2001-2019, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
35