ბოლო დროს ნაღმის არსებობის თაობაზე გახშირებული ცრუ შეტყობინებების წინააღმდეგ შინაგან საქმეთა სამინისტრო მოქალაქეებს კანონის სრული სიმკაცრით დასჯის შესახებ აფრთხილებს.

მას შემდეგ რაც გასულ კვირას ტელეკომპანიებში „რუსთავი 2“-სა და „იმედში“, ასევე თბილისის საერთაშორისო აეროპორტში ბომბის არსებობის თაობაზე ცრუ შეტყობინებები განხორციელდა, ანალოგიური ზარები გადაუდებელი დახმარების ოპერატიული მართვის ცენტრ „112“-ში კვლავ შევიდა 15 სექტემბერს საღამოს „რუსთავი 2“-თან, ხოლო 16 სექტემბერს ტელეკომპანია „იმედთან“ და საქართველოს პარლამენტთან დაკავშირებით - ყველა შემთხვევაში შენობებიდან თანამშრომელთა ევაკუაცია განხორციელდა.

პარლამენტის შენობაში, სადაც დღევანდელ შემთხვევამდე ორჯერ - 26 ივლისსა და 6 სექტემბერს ასევე შეფერხდა საკანონმდებლო ორგანოს საქმიანობა ცრუ შეტყობინებებით გამოწვეული ევაკუაციის გამო, ამჟამად გამნაღმველები მუშაობენ.

პოლიციამ ორშაბათს განაცხადა, რომ „რუსთავი 2“-თან და „იმედთან“ დაკავშირებული უკანასკნელი ცრუ შეტყობინებების „არასრულწლოვანი“ ავტორები დაადგინა. ბოლო დროს განხორციელებული ასეთი ზარების უმეტესობის უკან სწორედ არასრულწლოვნები იდგნენ. 

„იმ შემთხვევაში, თუ ცრუ ზარის ავტორი არასრულწლოვანია, პასუხისმგებლობა დანაშაულზე დაეკისრება მის მშობლებს ან მეურვეებს. ამასთანავე, ზიანის ანაზღაურება, რომელიც ცრუ განგაშის შედეგად ორგანიზაციებს მიადგათ, ზარის არასრულწლოვანი ავტორის მეურვეებს დაეკისრებათ“, - ნათქვამია შსს-ის მიერ 16 სექტემბერს გავრცელებულ განცხადებაში.

სამინისტრო ასევე აფრთხილებს, რომ ტერორიზმის შესახებ ცრუ შეტყობინებისთვის დაწესებული სამ წლამდე თავისუფლების აღკვეთა უახლოეს მომავალში კიდევ უფრო გამკაცრდება.