თბილისის მერს გიგი უგულავას დედაქალაქის განვითარების ფონდიდან 48.18 მილიონი ლარის გაფლანგვის საქმეზე ბრალი წაუყენეს.

უგულავამ, რომელსაც დაპატიმრების გარეშე წაუყენეს ბრალი, განაცხადა პროკურატურიდან გამოსვლისას მას შემდეგ, რაც ის 18 დეკემბერს დაკითხეს, რომ მის წინააღმდეგ წაყენებული ბრალდებები პოლიტიკურად მოტივირებულია.

პროკურატურა აცხადებს, რომ უგულავას წინააღმდეგ წაყენებული საქმე ორ ეპიზოდს მოიცავს და ორივე მათგანი უკავშირდება სახელმწიფო სახსრების გამოყენებას ნაციონალური მოძრაობის სხვადასხვა ხარჯების დასაფარად 2011–2012 წლებში.

იმავე საქმეზე ბრალდებები თბილისის მერიის ხუთ ყოფილ თანამშრომელს 2013 წლის ივნისში წაუყენეს. მათ შორის არიან თბილისის მერის ყოფილი მოადგილე დავით ალავიძე; თბილისის განვითარების ფონდის ყოფილი თავმჯდომარე გიორგი საბანაძე; თბილისის შესყიდვების სამსახურის ყოფილი უფროსი ალექსი თაბუაშვილი; ძველი თბილისის ყოფილი გამგებელი დავით ავალიანი და მისი მოადგილე დიმიტრი ჩხეიძე.

პროკურატურა აცხადებს, რომ ნაციონალური მოძრაობის და მისი აქტივისტების დასაფინანსებლად მართლსაწინააღმდეგოდ გაიფლანგა თბილისის განვითარების ფონდის კუთვნილი 13.85 მილიონი ლარი; კერძოდ, 2011 წლის ნოემბერში, ორგანიზებული ჯგუფის მიერ შემუშავებული გეგმის თანახმად, თბილისის მერის - გიგი უგულავას დავალებით, „თბილისის განვითარების ფონდში" ფიქტიურად გაფორმებული 719 შენობის კვლევის  სპეციალისტისთვის დამზადდა პლასტიკური სახელფასო ბარათები, რომლებიც რეალურად წარმოადგენდნენ არა ფონდის თანამშრომლებს, არამედ ერთიანი ნაციონალური მოძრაობის აქტივისტებს. თანხის გადარიცხვა 2011 წლის ნოემბრიდან 2012 წლის ივნისამდე პერიოდში განხორციელდა.

რაც შეეხება მეორე ეპიზოდს,  პროკურატურის განცხადებით,  34.32 მილიონი ლარი იქნა გამოტანილი თბილისის განვითარების ფონდიდან 2012 წლის ივნისიდან ოქტომბრის პერიოდში, რომელიც ნაციონალური მოძრაობის აქტივისტებს გადაეცათ. პროკურატურის განცხადებით, ჯგუფი „უგულავას დავალებით“ მოქმედებდა.

უგულავამ განაცხადა პროკურატურიდან გამოსვლის შემდეგ, რომ  მის წინააღმდეგ აღძრული საქმე "აბსურდულია“. პროკურატურის წინ, სადაც ის დაკითხეს, მისი მხარდამჭერები იყვნენ შეკრებილნი.

„თავიდან ბოლომდე პოლიტიკური გადაწყვეტილებაა“, – განაცხადა უგულავამ, „მოდის ადგილობრივი არჩევნები; უჭირს მთავრობას იმიტომ, რომ ივანიშვილმა ნამდვილად არაადეკვატური და უსუსური კანდიდატი დატოვა [რეგიონული განვითარებისა და ინფრასტრუქტურის მინისტრი დავით ნარმანია] და ახლა ფიქრობს როგორ შეასაღოს ეს კანდიდატი თბილისელებს. ამისთვის აუცილებელია ყველა სხვა კანდიდატის ჩამოშორება და ბუტაფორიული კანდიდატების შექმნა“.

„დავუმტკიცებ [სასამართლოს], რომ ვარ უდანაშაულო და შესაბამისად, ჩემს წინააღმდეგ წაყენებული ყველა შეთითხნილი ბრალდება ადრე თუ გვიან საპნის ბუშტივით გასკდება“, – განაცხადა თბილისის მერმა.

2013 წლის თებერვალში უგულავას ბრალი წარედგინა დიდი ოდენობით საბიუჯეტო თანხების მითვისება-გაფლანგვასა და ფულის გათეთრებასთან დაკავშირებულ ორ დამოუკიდებელ საქმეზე. ამჟამად მიმდინარეობს სასამართლო პროცესი ამ ბრალდებებზე.